環球車事：日本雙人自駕　租K-Car有So

日本「K-Car」好多人都知係咩，雖然體積少、馬力低，卻相當受當地人歡迎。點解？一來經濟、二來方便穿梭，相信去過日本小鎮的朋友都見識過啲路幾咁窄。

日本交通費相當昂貴，對於鍾意到日本自駕遊的港人而言，「K-Car」又有乜特別意義呢？就是一個字：「抵」！就如日本高速公路的收費，輕型車便較普通車平一至兩成，譬如由白川鄉去名古屋，單程收費便平上900日圓。假若行程會去幾個城市，成個Trip便可慳到幾千Yen，夠食幾碗拉麵啦！因體積所限，「K-Car」雖設有兩排座椅，但在預留位置擺放行李的前題下，並不建議多於三名乘客。就算畀你塞得落四個人，每人再抱住一個篋，都要考慮部車行唔行得郁呀。