本日日本:唔怕畫花!手機殼變筆記簿

2019年05月24日 18:00
東網電視
更多新聞短片
臨時臨急想搵張紙寫低重要事項?有wemo手機殼當堂唔駛煩,成個殼任你寫餐飽!(互聯網)

今時今日有乜嘢係最跟身呢?我諗十個人當中,應該最少有9個會答你手提電話!如此就手的物件,如果可以善加利用,絕對可以帶來更多的增值用途!日本的功能薄膜生產商Cosmotic及負責商業設計的kenma,啱啱推出了名為wemo的手機殼,賣點係該殼可以任你寫嘢畫嘢Drop Notes,簡單講係兼具筆記簿功能,甚至畫出獨一無二嘅手機殼款式,真係正到暈呀!

話說兩間公司之前已推出了wemo系列的第一彈「Band」,係為醫療人員開發出筆記手帶,一大特色係可隨身攜帶,舉起隻手就可寫低或閱讀重要事項的同時,亦避免了寫低筆記的紙張會整唔見咗,更重要係用油性原子筆寫下的Notes,用擦膠或手指便可刷走,所以一推出便大受歡迎。之後為辦公室人員推出第二彈,採用了黏貼式浮簽概念,同樣相當好賣。

今次再下一城推出手機殼,透過殼上的獨特表面塗層,讓大家可以用油性原子筆寫個痛快,唔使下下開手機都可以即時睇到check List,之後可用擦膠及手指刷走,即使濕水時文字並不會化開,效果相當不俗。而該款手機殼採用硅、聚碳酸酯及軟身微纖維所製成,相當硬淨,不過暫時只有iPhone 7/8/X/XS用的款式,顏色方面有深灰、珊瑚紅、珍珠綠及藍灰四種,各售2,000日圓,現率先於日本Amazon發售。

網址:https://www.wemo.tokyo