本日日本:吉野家出罐頭飯 邊款最好味?

2019年05月31日 18:00
東網電視
更多新聞短片
今日起吉野家會推出6款口味的罐頭飯,賣點係罐頭的肉類全部跟店舖所使用的一模一樣,夠晒原汁原味呀!(互聯網)

香港人對於罐頭飯,應該相當陌生,不過喺日本卻係另一回事,話說當地不時有地震發生,為免災難發生時無啖好食,屋企梗會有應急用的保存食品,其中一款就係罐頭飯!而香港人都好熟悉的丼飯連鎖店吉野家,今日起會首次推出罐頭飯,仲要一口氣推出多達6款口味,分別有牛丼、豚丼、牛燒肉丼、豚生薑燒丼、鹽燒鯖魚及燒雞丼,陣容相當強勁!除了口味選擇多,此系列罐頭亦不乏賣點,首先罐頭內的肉跟吉野家店舖的牛丼、豚丼、燒雞、牛燒肉及豚生薑燒所使用的一模一樣,另外米飯方面則採用高營養價值的金noibuki玄米,非常適合於災難時食用!睇罐頭的資料介紹,每罐各重160g,幾乎每款都落足各式各樣調味料,味道應該唔會太走樣,唯獨鹽燒鯖魚僅寫上食鹽(睇相片無乜汁,應該係堅的),加上222卡路里是6款罐頭中最低的,如果追求健康清淡的朋友,應該最Buy呢款!

想入貨一試的朋友,今日起可於吉野家的官方網上商店購買,1 Set 6款口味售4,860日圓,另有1 Set 6罐鹽燒鯖魚口味,售4,590日圓。處於常溫環境下,於罐頭生產日起計數可保存3年,雖然可即開即食,但建議用熱水浸10分鐘後才享用會更美味。

https://e-shop.yoshinoya.com/shop/e/ekanmeshi/