【深夜字聊】男友班損友好討厭

2019年06月17日 23:58
東網電視
更多新聞短片
【深夜字聊】男友班損友好討厭(互聯網)

每個男人身邊總有幾個損友,而話題總係離唔開錢同女人,之但係如果話題涉及同女友間嘅性生活,唔知女士又會點睇呢?話說有位女網民話:「男友有班勁老死嘅FD,當時我同男友未拍拖時,就已經聽到佢哋成日分享女友同老婆嘅性生活秘密。當時嘅我聽吓就算,點知估唔到家陣竟然會燒到我身上!早幾日我哋成班FD出嚟食飯,其中佢一個損友嘅老婆問我喺邊度買到Cosplay衫,當時我就奇怪點解佢咁問。佢同我講話佢老公同佢講,我同男友有玩Cosplay調情,佢聽到就想同老公試吓喎。我梗係嬲爆啦!佢(男友)竟然會同人哋講呢啲嘢,都唔知佢有冇同人哋講埋我鍾意玩Sex Toy,同埋最鍾意玩乜嘢體位添呀!乜啲男人會講埋啲咁嘅嘢㗎!」

網友神回應:

剋制黑仔:你又唔好鬧晒所有男人,係你個男友至會咁做啫。我男友班損友雖然係口衰啲,但從來都冇拎佢哋嘅性生活出嚟分享,起碼喺有女人嘅情況下唔會囉。

WIB:我覺得係你男友同班FD唔口密啫,佢哋私底下講完咪算,做乜要同身邊人分享呢?佢哋都知道女人好難守秘密啦,所以我哋係唔會亂咁爆出去嘅。

PennyAU:嘩,乜你男友同班損友咁㗎,點可能拎呢啲嘢出嚟講,要識得尊重其他人。佢哋試諗吓,如果女友或老婆拎佢哋嘅性能力,同班姊妹一齊笑嘅話,佢自己又點諗先?

我得你唔得:所以人品真係好重要,從呢件事可以睇出,你男友嘅人品好極有限,所以你嘅擔心絕對成立。如果唔想畀人唱私癮,你都係諗吓點同佢分手啦!