美食婷:喂~牛奶唔係鮮奶嚟個喎!

2019年07月14日 15:00
東網電視
更多新聞短片
日日飲奶身體好,但原來鮮奶與牛奶並不一樣,大家千祈咪搞錯。(互聯網)

去茶餐廳開餐,凍飲加兩蚊是常識吧!如果要轉鮮奶或特飲,就要再加多幾蚊。之前上網見到有網民報料話茶餐廳唔老實,明明加咗錢轉鮮奶,結果侍應卻奉上一瓶牛奶。可能你會話:「鮮奶與牛奶都係奶,不用分得那麼細。」不過兩者其實有好大分別,飲咗咁多年奶,你又知唔知道鮮奶與牛奶有乜唔同?就等我美食婷話你知啦!

成分大不同
首先講鮮奶,顧名思義就係100%純牛奶,含有人體所需的蛋白質、碳水化合物、維生素及礦物質。鮮奶會採用巴斯德消毒法(Pasteurization)進行消毒,以不低於攝氏72度高溫煮牛奶15秒殺菌,之後放於雪櫃可保存約一星期。至於牛奶則是奶製品,通常會加水、奶固體、穩定劑、乳化劑、調味劑等添加成分,大家經常飲用的高鈣低脂奶、朱古力奶、香蕉奶、士多啤梨奶就屬於這一類,由於會額外加入鈣質、維他命A和D,所以營養價值不會比鮮奶遜色。

靠顏色分辨
買牛奶時想知道究竟係鮮奶抑或奶製品,最準確的方法當然係留意成分,寫明100%鮮奶就是純牛奶。而大部分品牌亦會以牛奶盒的顏色或奶蓋方便分辨,例如紅色盒是鮮奶、綠色盒是高鈣低脂奶、粉紅色盒就是脫脂奶;樽裝奶方面,金蓋是奶製品、銀蓋是鮮奶、綠蓋則是高鈣低脂奶。留意返,因為銀蓋保鮮期只得1星期左右,所以茶餐廳供應的通常是金蓋奶,但正如網民所講金蓋奶並唔可以稱為鮮奶,想避免不必要爭拗就應該寫「轉牛奶」。