我係敢煮:咪講笑!勁甜長壽芽

2019年08月14日 17:00
東網電視
更多新聞短片
齋睇外形,相信大家都以為係普通豆芽之類,查實呢啲係有「長壽芽」之稱嘅花生芽。(互聯網)

我係「敢」煮
我唔係大廚,亦無上過堂學過廚,只係由細幫手入廚煮飯,可以話係由細煮到大,兼因為做嘢接觸好多大廚,偷到唔少師,唔敢話煮餸好叻,但堅鍾意煮,又乜都敢煮敢試嘅現代港女。
===========

早幾日同幾位辣友(鍾意食辣友人嘅暱稱)敍舊,當然搵了間川菜館挑啲辣菜食餐勁,席間柯打了一道水煮牛,味道不過不失,最驚喜嘅係墊底嘅配菜,講嘅唔係咩薯粉鴨血,而係「長壽芽」。嗱~係咪大家都未聽過呢?見大廚出嚟問意見,惟有請教一下,哦~原來係花生嘅芽,即花生芽,就好似綠豆芽、大豆芽之類。點解叫長壽芽?因為花生芽含豐富蛋白質和粗脂肪含量,並含維他命、鉀、鈣、鐵、鋅等礦物質及人體所需嘅氨基酸及微量元素,除有長壽芽之稱,亦被譽為「萬壽果芽」。

最厲害係咩?係中小辣嘅水煮菜式入面,花生芽除蘸了辣油嘅辛香之外,入口係食到一種獨特嘅香味。最正嘅係,由於每一條花生芽都非常飽滿,一咬落去係會卜一聲爆開,之後係嘗到滿滿香甜嘅汁液,先爽脆,後清甜,超驚喜!

如果問外形,花生芽同一般大豆芽非常近似,但體積及身形就飽滿得多,拿上手,會發現係常見大豆芽嘅幾倍。點解平時很少在街市見到(其實間中都有菜販出售,只是大家都以為是大豆芽之類而不以為意),大家可以間中在菜檔或超市選購得到。至所以說間中,係因為菜農(就算係種花生嘅農夫)不會特意種植花生芽,只是在收割花生後,將剩餘嘅芽收集,普遍係自家食用,所以市面上並不多見。

不少都指花生芽可以生吃,除非知道來源及生產地(或自己種喇),否則都建議煮熟食用。烹調方面,其實同煮豆芽一樣,可以直接入饌,又或先汆水稍為辟去青草味亦可。如烹調水煮菜式,可先灼至7成熟,與灼煮過的薯粉、韮菜等放在鍋底,才放入肉片(牛肉、豬肉,甚至魚片),注入上湯及灑上花椒辣椒,最後灒上辣油即成。如果係炒肉絲就更加簡單,只需先將醃過的肉絲炒熟盛起,放入花生芽爆炒,下先炒過嘅配菜後,放入肉絲兜勻,下調味即成,係一味超簡單但非常爽口美味嘅下飯菜!