趣怪一點：PrintPen　印咩都得？

打印機一般都係印於紙張上，有冇諗過打印機竟然可以於任何表面、物料上打印呢？PrintPen採用鋁合金長方盒狀設計，僅重255g，方便用家手持。用家只要於手機下載指定App，再透過Wi-Fi上載圖像、文字到PrintPen即可，之後就可以將PrintPen機底的26mm印頭放於需要打印的表面，再慢慢移動就會進行打印。因為印頭設有滾輪，確保打印時更流暢，而且可打印於不同物料上，包括紙張、布料、玻璃、陶瓷、金屬、木材、皮革、甚至皮膚，非平面都冇問題。PrintPen仲對應兩款自家研發的墨盒，每個墨盒都備有兩款墨水，一款屬家用，易於清洗並可用於皮膚上的深藍色以及螢光藍色墨水，方便創作和測試之用，玩味十足；另一款屬專業級、墨水較持久，提供紅、黑、藍三色，可用於商業產品上。PrintPen已於眾籌網Kickstarter上架，最平99美元已經可以購入PrintPen連一款家用墨盒，成功眾籌的話預計11月發貨。