迷你水果　的骰好食

如果你是一個有公德心的人，相信都會聽過：「病既人唔戴口罩，無病既人就要戴口罩保護自己。」不過推出蒙面法之後，遲啲流感高峰期殺到只好自求多福。其實有時毋須蒙面，用雙眼睇得清清楚楚甚至放上手慢慢摸都未必睇得通透，就好似今日介紹的迷你西瓜與迷你奇異果，表面上熟口熟面，但就好似畀多啦A夢枝放大縮細槍射過般縮晒水，唔知你又食過未呢？

幾可亂真　拇指西瓜

先講迷你西瓜，又有人叫它拇指西瓜，正式名稱是佩普基諾，其實是一種來自中美洲的攀藤植物，由荷蘭食品公司發現再將種子帶回荷蘭溫室培植，直至近幾年才在歐洲國家流行起來。雖然橢圓形的外觀、綠色外皮與花紋跟真西瓜非常相似，但Size卻只有拇指大小，可以原粒食用。

奇異莓果　清甜可口

至於迷你奇異果，不但外形跟正常奇異果一樣，就連味道都沒有太大分別，只是更清甜。這種迷你水果主要來自法國及新西蘭， 細細粒加上外皮光滑可以原粒食用，所以英文名又叫Kiwiberry。