冬至食好啲　蘿蔔半煎煮馬友

冬大過年，做冬當然要食好啲。仲未諗到冬至煮乜餸？不如就跟潮州師傅學番兩招，煮一道既合時令又好意頭的蘿蔔半煎煮馬友。台灣嗜魚者間有句俗語：「一午、二紅衫、三鮸、四嘉鱲。」排首位的午魚就是馬友的別稱，可以想像以脂肪豐富見稱的馬友有幾好味。潮州人喜歡將馬友做成魚飯，又或者當凍魚品嘗，其實冬天長得特別肥美的馬友用清蒸或香煎的方法烹調一樣風味無窮。至於白蘿蔔同樣在入冬後當造，潮汕地區又叫蘿蔔做菜頭，菜頭與彩頭讀音相近，因此做冬食蘿蔔亦有祝福闔家好運之意。

材料：

馬友 1條

白蘿蔔條 半斤

中芹段、蒜仔段 各2両

冬菇絲、紅椒絲、薑絲 各1両

胡椒粉、魚露 各適量

做法：

1. 將馬友打鱗洗淨，切成魚塊。

2. 爆香冬菇絲、紅椒絲、薑絲、蒜仔段及中芹段，備用。

3. 魚塊蘸生粉，炸至金黃色。

4. 加蘿蔔條同炒，以胡椒粉及魚露調味。

5. 全部材料炒勻即可上碟。