新iPad Pro「疫」市開工 Work唔Work?

2020年03月25日 19:30
東網電視
更多新聞短片
新iPad Pro於疫情下推出,只要連接Smart Keyboard Folio及Trackpad就有操控「電腦」的感覺,適合Home Office使用。(郭凱敏攝)
新冠肺炎肆虐,除了學生哥停課,不少打工仔都要在家工作。不過Work From Home其實唔係咁易,假如家中電腦陳舊,工作效率自然跟唔上進度。Apple日前推出全新iPad Pro平板,唔少功能媲美同門MacBook,一於同大家實測一下。
駁Trackpad移動游標
新iPad Pro去到第四代,跟兩年前的第三代一樣有11吋及12.9吋選擇,外形基本沒有變化,厚度只有5.9mm,比好多手機仲要薄。新機最特別是預載iPadOS 13.4作業系統,首度支援觸控板操作,只要藍牙接駁Trackpad,畫面就多了一圓形游標,可如滑鼠般移動它來開App、選取貼上文字、右Click開啟子選單,亦做到Mac的手勢操控功能,例如兩指上下滑動捲動網頁、雙指開合縮放相片、三指拖移畫面中項目等。若然加埋個Smart Keyboard Folio鍵盤,打字、剪片或執相都勁有Mac機感覺。
睇片打機一樣掂
新機採用Liquid Retina屏幕,支援P3寬廣色域顯示及原色調顯示,今次測試的12.9吋型號,解像度達2,732 × 2,048。瀏覽衞生防護中心的疫情地圖,先天已比用iPhone 11 Pro Max睇得更多。用來開Apple TV,更可以打爆全屏幕煲劇,而且對比度高,出名多暗位的《SEE》也看到豐富細節。除了睇片,公餘最好打機輕鬆一下,新iPad Pro對應ProMotion技術,懂得按需要自動把屏幕頻率提升至120Hz,玩賽車遊戲《Asphalt 9》連殘影都少咗,而且可接駁PS4手掣,機底四喇叭又夠大聲,奄尖Game迷無投訴空間。
全新鏡頭模組玩AR
相機模組則變成iPhone 11般的矩形設計,提供1,200萬像素廣角鏡頭及1,000萬像素超廣角鏡頭,支援2倍光學變焦及4K影片攝錄。另首度加入LiDAR感測器,透過測量光線投射至物件並折回所需的時間,從而判斷距離,配合全新A12Z仿生晶片,帶來更佳的AR體驗,家長們大可與小朋友在家暢玩AR益智遊戲。
Home Office長氣之選
續航力方面,廠方指上網睇片夠用10小時,實測以最高亮度播放一集Netflix《梨泰院》,大約消耗10%電量,叉爆相信夠睇10集!總括來說,新iPad Pro加Trackpad,同時滿足文書、娛樂、學習需要,絕對適合Home Office之用。若各位想找一部既輕便又高效能的平板開工,新iPad Pro絕對值得入手。相反,如覺得iPadOS的軟件始終不及MacOS豐富,似乎同期推出的新MacBook Air會更適合。