EVA期間限定美食連卡牌

如果巴絲打係EVA（新福音戰士）嘅粉絲，應該一早收到風劇場版最終章預計將於今年6月27日上映，於是吸引眾多品牌推出周邊產品以配合，好似由丸美屋食品工業於4月23推出嘅新福音戰士期間限定牛肉咖喱（每包售260日圓），以及兩款飯素，分別係紫菜芥辣及三文魚口味（每套有8包，每套盛惠160日圓）。咖喱牛肉有6款包裝設計，而飯素則有兩款包裝設計，粉絲真係要大破慳囊至可以買足所有款式。

此外，所有期間限定產品入面均附送一張卡牌，而卡牌一套有12款，要儲齊一套，肯定唔止食12包囉！

期間限定產品原供應至7月31日，但由於肺炎疫情關係，劇場版好大機會延期上映，有可能連呢啲期間限定嘅產品供應期亦有所改動，粉絲就要密切留意喇！