獨家消息︰李國能知法犯法衝紅燈

終審法院前首席法官李國能在任期間曾發生多項爭議事件，但估唔到佢離任後爆爭議，今次仲係知法犯法添！卓妮今日下午三時許途經灣仔軍器廠街中南大廈對開時，就見到西裝骨骨的李國能在行人路急急腳係咁行，當行到駱克道交界過路處時，竟然知法犯法「衝紅燈」，不守交通規則過馬路，咁啱有的士轉彎駛到，情況險象環生。

李國能懶理當時行人交通燈亮起紅燈指示，知法犯法衝紅燈過馬路到中間行人安全島，當時適逢有的士正右轉駛入駱克道，只係差幾步就可能發生交通意外。李國能過咗「半程」馬路抵達中間行人安全島後，未見有明顯停步迹象，隨即在「閃閃吓」的綠色公仔交通燈指示下，繼續大步大步橫過餘下半條過路線。李國能險象環生過完馬路後，繼續急步橫過軍器廠街過路線，好彩當時「綠公仔」燈號亮着，否則唔知佢會否再一次知法犯法「衝紅燈」呢？最後見佢朝灣仔警察總部方向急步走，期間仲邊行邊睇錶，過路之後就好快喺人群中消失。

李國能知法犯法衝紅燈，姑勿論最終執法部門會否對佢作出檢控，但李國能曾出任終審法院首席法官十多年，都竟然知法犯法「衝紅燈」過馬路，開講有話「遲到好過無到」，真係枉佢做過大法官呀！

詳情請看明日《東方日報》政情版的「中環出更」，以及《太陽報》政壇版。