陳家強娶新抱政商猛人齊祝賀

今年雙春兼閏月，唔少人會趁好年結婚。財經事務及庫務局局長陳家強就搶閘升格做新老爺，今晚(17日)陳家強喺香港會搞雞尾酒會，慶祝佢嘅大仔陳漢唐(David)迎娶韓籍靚女Dina Shin。數百名政商及學術界名人攜伴出席，包括特首梁振英、曾經盛傳會參選特首但最終冇出選嘅馮國經，仲有選輸咗特首嘅前政務司司長唐英年等人，真係星光熠熠，熱鬧到極。

陳家強望落好後生，估唔到咁快就有新抱茶飲，其實David已經27歲，同Dina都係喺紐約從事金融業。陳家強大讚新抱簡直係100分，因為阿仔喺紐約淨係掛住工作，性格又外向，唔係太顧家，以前都冇打電話或寫電郵返屋企。但自從同Dina拍拖後就成個人唔同晒，唔止會發短訊畀佢，生日仲會寄電郵氹吓個老竇，令佢受寵若驚、喜出望外，而呢啲都係新抱嘅功勞。陳家強又話，下周六一對新人會去韓國搞多次婚禮，到時佢同太太都會出席，陳太仲會入鄉隨俗穿韓服添！

今晚到場祝賀嘅仲有曾掌舵恒生銀行嘅創興銀行副主席兼董事總經理梁高美懿、行政會議成員葉劉淑儀、最美麗港姐朱玲玲及唐英年夫婦等。卓妮問梁高美懿點解肯出山，佢就望住丈夫話，最緊要梁生點頭，梁生就趁機投訴話，太太退休之後都係冇時停喎！

唐英年講起近況時就話，最近開始擔任以爺爺唐君遠為名嘅教育基金理事，該基金設於上海，希望可以幫助內地有需要嘅人。佢話基金係佢爺爺90歲大壽時，吩咐家人將幫佢做生日嘅錢省下，用嚟搞基金幫吓人喎！