斥資2100萬元的荃灣鱟地坊小販市場改善工程完成僅1年半，卻遭檔戶怒轟新不如舊，不但通風欠佳兼且全場無水供應，導致人流大跌。「個新設計完全遮唔到太陽，食環署又唔畀整簷篷，啲衫雖然套咗膠袋、仲用布遮住，但都曬到甩晒色，搞到賣唔出蝕大本！」售賣女裝的李小姐指出，小販市場換上天幕設計後，檔攤即變成「好天曬落雨淋」，加上通風欠佳而過於翳焗，令客人全無意慾入內購物，生意額因而暴跌。

至於經營童裝的黃婆婆則對市場內未有供水深表不滿，「朝朝早開檔都要拎住個水桶、走兩條馬路去街市廁所排隊拎水，一來一回都用咗9個字，仲要畀街市啲人鬧！阿婆幾廿歲都唔想咁辛苦抽水，但冇水點做嘢？」另外，亦有租用市場外圍攤檔的商戶表示，每逢下雨檔攤附近便乍現「水柱」，嚴重影響生意。

「食環署承諾過工程完晒就會有水供應，但依家又反口話唔整！我問過水務署都話可以供水，咁食環嘅理據係乜？」當區區議員葛兆源直斥食環署違反承諾，無視檔戶慘況，要求儘快作出改善。葛又稱，工程完成後當局一直「零宣傳」，不少街坊熟客甚至以為市場已告關閉，而翳焗環境更是市場人流大降的元兇，直斥翻新工程「唔做好過做」。

立法會議員麥美娟亦狠斥食環署浪費公帑，令檔戶慘成犧牲品，「啲公務員根本就坐喺冷氣房發夢，冇實際考慮過檔戶同顧客嘅需要，結果嘥咗咁多錢都改善唔到環境，仲要衰過以前！」麥美娟又指，政府邊宣稱要活化特色小販市場，事實上卻「得個講字」，令價廉物美的小販市場難敵大型商場，擔心將日漸消失，要求當局正視。

食環署發言人承認，就上址通風與供應食水問題分別接獲2及3宗投訴。對於被指違反供水承諾一事，發言人解釋，重建前曾於市場外設置水喉，但引致衞生問題，現仍進行優化工程。至於通風系統及市場外圍於下雨天時疑出現水柱等問題，則已一併轉介建築署跟進，以研究改善方案。