脫毛變二級灼傷　政府監管醫學美容嘆慢板

接連發生與醫學美容有關的事故，立法規管卻一直只聞樓梯響，接受醫學美容後受傷的個案近日再添1宗。「打緊落去嗰陣已經好痛，治療師就話可以調低啲個度數，點知做完之後愈嚟愈痛，返到屋企先發現又紅又腫，仲起埋水泡！」阿盈（化名）去年向脫毛公司購買4個部位的脫毛療程，使用期間一直並無問題，直至早前在比堅尼位進行激光脫毛時卻感異常痛楚，雖即時向治療師反映，但最後仍出現紅腫及水泡，經皮膚科專科醫生診斷後證實為二級燒傷。

阿盈事後對治療師的質素深表關注，「揀脫毛公司都係睇名氣，但對治療師嘅年資，有幾多專業知識真係完全唔知，政府係咪有責任快啲立法？」阿盈不滿政府立法規管的工作「得個講字」。

有關脫毛公司回應查詢時稱，該公司聘請之治療師均須接受嚴格及專業訓練，並通過考核才為顧客提供服務，惟培訓內容及時間則為公司機密，不便對外公開，僅強調一向致力為顧客提供優質、安全及可靠之服務。

「據知坊間都仲未有同脫毛相關嘅考核，所以都唔建議市民搵美容師去脫！」身兼醫學會會長的皮膚科專科醫生史泰祖指出，激光脫毛與膚色及毛髮色澤息息相關，激光會重點擊打黑色素，膚色較深者會較易令皮膚及毛髮燒傷。史醫生強調，市民一般接受脫毛療程都不應出現燒傷情況，倘脫毛後出現皮膚紅腫及有水泡，估計已屬二級燒傷，建議市民找合資格醫護人員進行脫毛療程，切勿誤信廣告。

就政府對美容業的立法規管工作，立法會議員麥美娟認爲刻不容緩，「關於激光脫毛服務嘅行爲屬性，其實一直存在好多爭拗，因爲有啲人認爲佢屬於醫療行爲，有啲認爲係美容行爲，所以政府都喺度拖緊規管立法，到依家都未有定案！」至於推行資歷架構一事，麥美娟則認為政府應多聆聽業界意見，以提升各行業的服務質素，「政府應該聽下所有業界嘅意見，其實好多人都願意考一啲專業資格牌照，所以先會同政府合作推行資歷架構。」