郵政寄包裹又出事　反要求寄件者付款贖件

「我要寄部相機同電池去澳洲，職員話相機電池唔可以一齊寄，一定要分開，明明兩件郵件寄嘅地址都一樣，點知最後只係收到船郵，空郵就收唔到！」梁小姐於去年10月經香港郵政郵、以掛號及快遞形式郵寄兩件包裹予身在澳洲的兄長，未料兄長等候近1個月仍未有收到空郵包裹，向郵政局追問後，始獲悉空郵包裹早已送回香港，「郵政初初話因為過咗期冇人拎所以退返香港，之後又話收件人拒收，再之後又話地址啱但冇呢個收件人，總之好亂！」

梁小姐指其後終接獲郵政來信，但要求繳付500多元始能贖回包裹，如限期內不贖件則會送交慈善機構，「其實有啲速遞公司仲平，但我見郵政係公營機構，點知原來都冇保障！」梁小姐坦言今次事件後，已對郵政信心盡失。

香港郵政發言人解釋，事涉退回包裹組錯誤向郵件查詢組表示郵件「未有被領取」，事實上當時郵件已標示退件原因為「派遞地址人士不認識收件人」，加上澳洲郵政曾先後提供不同的退件原因，引致職員處理個案時向寄件人提供的資料前後有別，強調一直向寄件人提供調查進度。

發言人又稱，寄件人領取由外地退回香港的郵件時，需支付由原目的地郵政機關徵收的相關費用，若2個月內未有領取，將按既定程序，以郵件包裏物品性質作適當處理，如屬可轉售物品，會交由政府物流服務署安排拍賣，而過去1年涉及包裹被退回的個案共有30宗。

不過，記者事後向梁小姐查詢，梁卻稱僅接獲郵政電郵，表示會再向澳洲方面查詢，惟至今仍無回覆。

「就算係澳洲派遞嗰邊出咗問題，郵政收得市民錢就有責任，冇理由仲要寄件人贖番件郵件，而且唔係畀唔畀錢嘅問題，要人哋贖完又要重新寄過，損失仲大！」立法會議員麥美娟直斥香港郵政經常以自負盈虧為由，旗下服務收費不比私人機構便宜，但服務質素卻未成正比，令市民失望。麥美娟要求郵政向當事人清晰交代事件。與此同時，麥又擔心香港郵政服務每況愈下，將難以跟私營公司競爭，「到時冇生意又要自負盈虧，可能又要加價，結果就變成惡性循環，最終令市民受害。」