網民熱話：走甩咗係粗口？　陳年卡通熱爆網

早前，緊急應變中心安全主任梁國安一句：「睇住呀」，令其一叫成名，網民曾熱烈討論其「有震撼性的聲音」當中是否有混雜粗口。無獨有偶，最近網上又熱傳一段多啦A夢的卡通短片，片中其中一個角色的配音大叫一句「走甩咗」，有網民卻指發音與粗口字相近，因而在網上引發熱議。

短片來自多啦A夢電影系列中的《大雄的天方夜譚》，電影於1991年上映。片中多啦A夢一行人被鎖在囚室內，但就因機械人的幫助而成功逃離。獄卒發現後就大叫「佢地走甩咗呀！」通知其他獄卒追捕。最近這段短片突然又在網上重新熱傳，皆因有網民質疑聽到配音是說「佢地走X咗呀！」，引起一片粗口疑雲。

短片於facebook上載一日，已有了逾千個分享。有網民笑指這是白金藍黑裙的叮噹聽力版本，雙方都力證自己無聽錯，也有不少網民指聲稱聽到粗口的人只是心有歪念，稱他們聽到配音說甚麼，就反映了自己是甚麼人。

網民有話說

Chi Long Lei：你個心念個X字就會聽到X，當你念到甩字就會聽到係甩，試下就會知

Chun Ho Lam：笑左，有字幕就走甩咗，冇字幕就走X咗

Cindy Lau：佢最尾有鼻音