愛犬高壓氧治療後下顎斷裂　主人投訴無門

柯小姐飼養的北京狗「笨笨」現年7歲，一直有頸椎凸出問題，早前獲獸醫轉介至1間獸醫診所接受高壓氧治療，冀可改善情況。柯指事前已再三向醫生了解治療的副作用及風險，「當時醫生好肯定咁同我講話冇副作用同冇風險，最多只係改善唔到頸椎凸出問題，我先放心畀笨笨試！」

然而，柯小姐指笨笨接受首2次治療後皆有失禁情況，第3次治療則嚴重受傷，「頭1、2次職員話隻狗太放鬆先會失禁，第3次入去之前我見到有隻貓都準備做同一個治療，我哋講明隻狗會緊張，唔想貓狗放埋一齊，但職員話佢哋有兩個高壓氧倉會分開治療，我先放低笨笨，點知就出事！」柯指當日離開不久即接獲診所來電，指笨笨因緊張過度而咬籠致舌頭流血，需立刻停止治療，當晚笨笨亦不肯吃喝及如廁，檢查後證實牙齒倒置及脫落，下顎更告斷裂，需立即進行手術。

事後柯即時與診所對質，翻查醫療記錄時發現第3次治療疑僅有獸醫助理在場，「份紀錄好清楚見到頭1、2次都寫由醫生主理，第3次就得個助理！診所職員認咗佢哋只係得1個高壓氧倉，但就點都唔肯認有問題，仲話我隻狗本身有心臟病先會搞成咁，又話醫生有主理只係個紀錄寫漏，點都唔認錯！」

涉事獸醫診所發言人以投訴人已報警為由，拒絕回應本報查詢，僅稱已向投訴人交代事件，着記者向對方了解。

「《註冊獸醫實務守則》入面列明醫療記錄係用嚟保障雙方法定權益，事主絕對可以向當局投訴！」立法會議員陳克勤認為，當事人可保留相關記錄作投訴甚至索償，亦認同現時當局對獸醫診所監管不足，而獸醫管理局處理個案的進度亦未如理想，往往令市民投訴無門，同時令小動物無辜受苦，建議當局盡快作出改善。

獸醫黎昌生直指高壓氧治療過往較常用於人類，用於動物則較少見。黎指狗隻下顎需要大衝力碰撞或咬力才可致斷裂，認為心臟病並不會引致，但高壓氧治療或可令動物耳朵產生痛楚，並非全無風險，認為若發現動物有驚恐、失落甚或痛楚表現應立刻停止治療。黎續稱，動物失禁或因肌肉失控、受驚過度或緊張過度，若治療間出現失禁，獸醫有責任即時判斷原因及風險，以及評估應否繼續。