主播15秒急口令讀130字　紅爆網絡挑機不絕

一條財經主播急口令式的讀稿片段在網上瘋傳，紅爆多個網上討論區，更激發不少網民試讀挑戰。無綫高清翡翠台節目《創富坊》財經主播林芷彤在節目中，僅用約15秒讀出逾130字的免責聲明，即平均一秒讀9個字，技驚四座，多個網上討論區俱有網民紛紛轉載。

不少網民更挑戰試讀，有網民以16秒完成，僅輸1秒，亦有人以22秒讀完，雖然較慢但讀稿較清晰；似乎網民都未能挑機成功。有網民大讚林芷彤「非常堅」，但亦有人指「講咁快人哋都唔知佢講乜有咩用」，亦有網民自稱忍不住不斷「翻loop」，似乎聽上癮。

該段免責聲明全文如下：

以上嘉賓係金管局同證監會嘅持牌人，以上談及嘅結構性產品並無抵押品，如發行人無力償債或者違約投資者可能無法收回全部或部分應收款項，結構性產品嘅價格可以急升或者急跌，投資者有機會蒙受投資嘅全盤損失，而過往嘅表現並非未來表現嘅指標，所以投資前呢請參閱相關嘅上市文件作出風險評估，同埋尋求專家嘅意見。