網民熱話：港女辭職派喜帖　被諷極品散水餅

婚禮是人生一大喜事，當然要廣宴親朋，但人在職場派帖也要好好把握時機，否則難免畀人唱足一世！最近有位OL在辭職前最後一日出「絕招」，派送蛋糕散水餅之餘，更附送喜帖乙張，可謂「人人有份永不落空」，有網民驚呼此做法「前所未聞」，批評該同事「都幾絕」、「賺到盡」，對其大為反感。

網民breakbits在香港討論區發文，指公司早前有1位女同事辭職，因其「港女格」，人緣好極有限，大家對其離去亦不感可惜；豈料港女在辭職前1天，除循例派送蛋糕散水餅外，竟向每位同事附送喜帖一張，更選擇在「人情好貴」的酒店擺酒。發文者收到這份「極品散水餅」、「大炸彈」後大感尷尬，稱自己和一眾同事與她根本不稔熟，並諷刺指「大家都會永遠懷念佢呢個LAST DAY(最後上班日)」。

網民紛紛指摘港女的行徑「好變態」、「神憎鬼厭」，有人認為港女既已辭職，日後應不會再見，大可拒絕出席，建議發文者收喜帖後可以「當無事發生」，甚至「轉頭丟入垃圾桶」，只收散水餅及回禮利是。更有人批評在酒店擺酒「食一餐飯要畀成800蚊人情」，非常不合理。

不過，有網民戲謔稱喜事始終要送禮聊表心意，建議發文者與同事可以「夾埋一齊唔去」，然後「夾份送舊水晶，500(元)有找」，強調水晶要越大越好，要港女「搬都唔知點搬」，或者乾脆送上花牌，甚至回贈散水餅了事。但亦有網民同情港女，指發文者在收帖後大可選擇不出席，不必「上網唱人」，大肆宣揚。

網民有話說

pinkyn：正常都唔去同唔封人情啦，理得佢

chickroy：唔問就派真係乞人憎，同屈你禮冇分別

manage：唔熟無聯絡，可以不理啦，連張帖都蝕埋

Xx-devilkit-xX：夾份送音樂盒算啦，不過邊個做爛頭卒，送去現場先?

nickpang4311：紅包塞報紙