白鴿靚女傳單錯字截止變載止 罰抄冧掂網民

20150702
東網電視
更多新聞短片
宣傳單張上「截止」變「載止」,曾素麗道歉之餘更罰抄100次。(互聯網)

今日(2日)網上瘋傳一張由民主黨(白鴿黨)沙田區議員鄭則文,同靚女社區主任曾素麗(Yen)名義發出的宣傳單張,呼籲市民最遲要在今日截止前登記做選民,點知就將「截止」寫錯做「載止」,變成「7月2(日)就載止啦!」,政黨單張張冠李戴並非首次,自然逃不過網民法眼,不過有人肯主動認錯認真寥寥可數。

阿Yen其後於社交網站主動留言,表示「對不起,我錯了,罰抄一百次」,然後附上一張相片,顯示佢以鉛筆於紙上罰抄100次「我以後唔會再寫錯個截字。」

阿Yen主動認錯又乖乖自動罰抄,楚楚可憐嘅舉措令網友留言急「轉軚」,安慰佢唔好唔開心,支持佢,有人仲問佢係咪真係抄咗咁多次。阿Yen留言「童叟無欺」回應,保證以後唔會再寫錯字。阿Yen識得主動拆彈,又冧得掂一批網友,睇嚟真係錯有錯着!