政Whats噏：泛民人士排隊爭住認做傻仔

立法會議員劉慧卿(卿姐)周日(6日)出席論壇時一句「傻仔」回應主持蘇敬恆，就惹來政圈一片「抽水」潮，個個排住隊認是卿姐口中的「傻仔」。卿姐今日(8日)主持網台節目時表示，她已忘記幾時開始講這句口頭禪，但講咗咁耐，大家都冇乜意見，可能今次是電視機面前講，先令網民有所反應。至於將來會否收回這句口頭禪，卿姐話別人唔鍾意就唔講喎。

咁有邊啲人被卿姐叫過「傻仔」呢？卿姐話其中一個係佢讀倫敦政治經濟學院嘅師弟、離島區議員周浩鼎；而卿姐一班黨友事後陸續認頭爭住做「傻仔」。黨友尹兆堅話，卿姐都試過叫佢「傻仔」，又試過開會時當住咁多人面前話「唔係呀嘛，傻豬」、「離晒譜」呢啲口頭禪，但佢認為講呢啲說話係睇環境，並非侮辱對方。

會計界議員梁繼昌(Kenneth)都話，卿姐成日都叫佢同資訊科技界議員莫乃光及法律界議員郭榮鏗做「細佬」或「衰仔」，尤其做議員頭一兩年，佢哋唔記得熄座枱燈就走人。Kenneth都話呢件事抵鬧，因為浪費能源，而被卿姐鬧完，事後佢哋都會乖乖哋熄燈，咁就唔使卿姐勞氣喇。