網民熱話：老西＝窮人恩物　扮嘢先會着？

西裝，是不少上班族的戰衣。一件老西除可提升型仔度，亦能塑造專業形象，返工、見客無往而不利。本來着唔着西裝，只是個人及工種需要問題，但有網民卻將此與財富及權力劃上等號，提出「愈窮愈低學歷嘅人愈多着西裝返工」，暗諷愛着西裝的打工仔只是扮嘢，真身其實是「西裝乞兒」！此一偉論，自然有不少西裝友因此被辣㷫。

網民MHF2324近日在網上討論區分享其精心觀察，指撇除中環返工的專業人士、大老闆及政府高層後，發現大部分穿西裝返工者都是「地產sales、保險sales、傳銷sales……」，一看髮型便露餡，其實真身只是「低學歴(歷)mk」。樓主更深入對方的內心世界，狠批相關人「 自卑怕畀人睇唔起」，故要「靠套老西嚟挽回自信及尊嚴」。樓主又舉例指身邊不少富貴人士衣着求其，經常「牛記笠記」、「 T恤牛仔褲短褲拖鞋」返工外出，反證穿西裝上班的低層人員是打腫臉充胖子，明明「住公屋逼巴土，銀包又冇錢」，卻仍要死充。

此言一出，一石激起千層浪。有網友立即反諷樓主將專業人士、大老闆及政府高層等常穿西裝的人士撇除，等同在說「唔計D(啲)有錢人，全地球D(啲)人都係窮X」的廢話，反而顯得樓主「見識少」，缺乏在大公司返工或出任高職位的經歷，不知道當銷售員隨時人工亦「10萬8萬」，亦不知道甲級寫字樓會有「dress code」(衣着要求)，返工想「casual(隨意)都唔得」，同時衣着亦反映對工作的尊重，即使真是學歷愈低愈窮愈愛着老西，最少亦反映他們做人非「求求其其」，肯包裝自己。

不過亦有網友讚樓主眼光獨到，認同「愈係高調的人愈無料」，愛名牌正裝打扮者只是「睇落好似有錢」，實際真正有錢人多是「禾杆(稈)冚珍珠」。有網民就指，窮人亦是無計可施才要靠衣着增強自信，因為一般平民「從來未享受過好野(嘢)」，怕被人看低，才會如此武裝。

既然衣着打扮非絕對準則，那麼怎樣才能簡單分辦隱世有錢人？有網民便教路，「老細就算便服，手都會有隻撈(勞力士)」，只要睇撈辨人即可，且分辨別人富貴或貧窮，最重要的還是要看他們「住邊度」。

網民有話說

claimvo：窮人成功之道，初靠衣裝，次靠花言巧語(刷鞋)。

orca：多數公司要求Sales著(着)西裝返工，反而個sales唔著(着)西裝，我會覺得佢唔尊重個客

345g：好多西裝友都係斯文敗類

guthrie：著(着)乜衫查實真係冇咩所謂。最緊要係，住邊度。

川口千里：人地(哋)著(着)咩都要葡萄？

※緊貼網民熱話，掌握最熱話題，請關注網民熱話fb：

http://on.fb.me/1L3m1ro