無償試用：讚好歪風　席捲律師攝影專業服務

專業服務「無價」？港媽欲以「like and share（讚好及分享）」換取專業拍攝服務，結果遭攝影師拒絕的事件，日前在網上鬧得熱烘烘。原來，攝影界「中招」的情況極普遍，有攝影師以為能夠幫助有需要的家庭，無償為1個親子活動做義工，詎料相關搞手連1句多謝也沒有說，雖感覺「中伏」，但為專業操守仍完作任務。最離譜的是，有資深律師曾竟被要求「試用」證婚服務，感覺專業被侮辱。

個案一：攝影師

「有個女子話想我贊助佢哋親子攝影活動，過程約3小時。」專業攝影師Terry向記者憶述當時情況，「原本諗住係小朋友聚會，希望可以幫到手，點知入到去先知道自己『中伏』！」Terry準備器材，指定時間抵達派對場地，為40個家庭拍攝，「我上到去就WhatsApp畀嗰位女士，佢竟然『已讀不回』，我嗰刻心知不妙！」半小時後，該名女士出現，她只與Terry簡單打聲招呼，連1句多謝也沒有。

「嗰陣我真係好嬲，就算我願意提供免費影相服務，你都應該尊重我，至少同我溝通下，講下想影乜，而唔係當我透明！活動完結亦無人同我跟進，成件事，我覺得被騙！最搞笑嘅係，該名女子竟再聯絡我，佢話『仲有另外2個活動時間，問我有無時間。』我就問：『有幾多酬金？』對方即刻收聲，從此消失！」

個案二：律師

「呢個世界上，所有工作都應該被尊重，唔係樣樣嘢都有得試，每份工作都有佢嘅重要性，亦都有個價錢，」任職證婚人律師近10年的Anthony，今年9月，第1次接獲「無償服務」要求。「接獲1個女子致電，佢自稱係婚禮統籌師，佢問我：『你有無興趣向新人提供證婚試用服務？效果理想嘅話，到時再介紹其他客人畀你。』」他聽了之後，即時覺得十分驚訝，若對方來電前有做過資料搜集，不可能向他提出這個要求，他覺得這個婚禮統籌師的做法很有問題，所以一口拒絕。

Anthony估計該名女子將他視作新人，才會向他提供這個無理要求，「但點講都好，呢件事令我感到非常無奈，甚至覺得對方沒有尊重過我嘅專業。」他早前曾聽聞過，有業內人士也收過同類或極低薪的要求，呼籲同行拒絕一切的無理要求。「好多人以為證婚律師嘅工作好簡單，但其實好多細節要處理，全部都要靠經驗，先可確保婚禮順利進行。」

安俊人力資源顧問有限公司董事總經理周綺萍表示，「無償服務」的出現，是一種不良社會風氣，此風不可長。她指一般商業性質服務，應加入物質交易，至於涉及慈善或學術性質，才可考慮提供「無償服務」。