政Whats噏：新思維成立　前藝員黃澤鋒入黨

由民主黨前黨員成立嘅新思維，今日(3日)舉行會員大會，正式選出領導層，無懸念由狄志遠(Dick)擔任主席，新民黨前副主席鄭承隆、姜炳耀及廖添誠為副主席。最吸睛嘅唔係呢啲，反而係早走嘅黨員、無綫及港視前藝員黃澤鋒，藝員背景加入政黨真係好少有，我哋就捉住佢傾番幾句。

原來黃澤鋒同姜炳耀兩三年前認識，得閒會飲嘢食吓飯，近排黃澤鋒問姜忙緊乜，對方就乘機游說黃入黨。黃澤鋒話，認同中間路線，但就只得佢一個人入黨，冇叫其他藝員朋友喇，今個星期四(7日)黨成立晚宴仲會做司儀。姜炳耀就透露，仲同幾名現職藝員傾緊入黨，成事先肯公布人選喎。

新思維秘書長係年僅24歲嘅黃俊瑯，佢係理工大學學生會前會長，依家創業做網購潮流波鞋、衫褲。佢4年前曾經幫老師、工黨張超雄助選立法會選舉，今年更短暫入公民黨三幾個月，幫同為理大前會長嘅陳文煇選區議會選舉。佢話公民黨路線同佢理念有別，加上去咗幾次新思維政策研討會，畀Dick落嘴頭，認同新思維路線，就決定入黨，仲透露將來有意參選添。不過佢話，當年做會長時較關注高教界議題，少參與學聯，所以冇搵學界中人入黨。

※更多政經猛料、秘聞，請關注政Whats噏fb：

https://goo.gl/ndFQNz