潮Buy:康泰50周年 驚喜優惠大放送

20160105
東網電視
更多新聞短片
為慶祝開業50年,康泰今年將會舉行連串慶祝活動同優惠。

香港人出名鍾意去旅行,踏入新一年,梗係要計劃下旅行大計啦!有旅行社今年踏入50周年,將會以「發放旅遊正能量」為主題,推出連串活動同旅遊優惠,包括「月月驚喜大優惠」,推出半價旅行團等超級優惠。旅行社亦會推出多個不同主題嘅「特色之旅」,例如「名家食番天」系列、攝影之旅,仲有主打體育盛事嘅特色旅遊等,仲唔快啲mark定假,plan定下次去邊玩!

踏入2016年,康泰旅行社已經喺香港開業50年。為咗慶祝成立50周年,康泰將會舉行連串活動,其中康泰旅行社董事總經理黃進達就公布,同多個地區旅遊局加強合作,包括泰國政府旅遊局、台灣觀光協會、韓國觀光公社、日本國家旅遊局、新加坡旅遊局、馬來西亞旅遊促進局同澳洲旅遊局合作,全年將會以主題形式重點推廣呢7個地區,例如台灣養生遊、韓國K-Pop之旅等;亦會開拓較冷門地區嘅深度遊,如高加索、不丹等,希望向港人展現呢啲地區嘅面貌同吸引之處。

除咗同多個地區嘅旅遊局合作外,更會以「快樂共享50載,發放旅遊正能量」為主題,全年推出多項旅遊優惠。活動頭炮將會推出「月月驚喜大優惠」,每月定期發放驚喜優惠,只要通過指定QR CODE或者社交網站貼出嘅連結,就有機會訂購指定旅遊產品。康泰市場推廣及業務發展助理總經理樂紹基稱,一月份將會推出「$649曼谷芭堤雅5天團」,原價要$1299,依家以低至半價價錢推出,名額50位,聽日(6日)就正式開賣,真係抵到震呀!

除咗每月驚喜優惠,更有重新包裝「特色之旅」,包括以美食名家嚴選菜單兼親自帶隊嘅「名家食番天」系列,今年將會與兩大美食名家梁文韜同紀曉華合作,推出接近20款美食團,帶團友到北京、日本大阪及京都等地,品嘗各地佳餚同米芝蓮美食,嗜食之人絕對不容錯過。另外,亦會深化豪華旅遊產品優尚系「Hong Thai Deluxe」、由攝影名家主理嘅攝影之旅,仲有主打體育盛事嘅特色旅遊,帶你近距離觀賞馬拉松、歐洲國家盃等體壇盛事,真係總有一款啱你。

如果你鍾意自由行,都一樣有好介紹。康泰籌備超過1年嘅全新實時機票手機應用程式,將會喺今個月內正式推出,呢個App涵蓋全球超過120個城市來回機票,同提供逾60間包括廉航嘅航空公司機票,畀大家選擇,而且全部都係實時報價,價格一目了然,稍後仲會聯同各間航空公司,準備推出震撼優惠價,相信好快就會公布優惠詳情,真係不容錯過。

另外,出晒名識玩識食嘅康泰旅行社董事長黃士心,近年熱衷出書分享旅遊心得,撰寫了多本旅遊工具書,近日佢又有新作推出,介紹日本嘅京阪神地區。佢話呢本書介紹所有地點,佢都有親身去過,覺得好食好玩先推介畀讀者,啱晒鍾意自由行嘅香港人,佢仲特別推介大家去神戶嘅有馬溫泉,同必食神戶牛,「我自己都去有馬溫泉浸過幾次溫泉,真係無得頂!」