政Whats噏:寄宿食到厭 楊紫芝怕咗豬牛肝
香港大學何東夫人紀念堂今晚舉行65周年晚宴,近200新舊校友出席,包括港大醫學院內科學系榮休教授楊紫芝及著名導演張婉婷等。楊紫芝大談當年寄宿何東宿舍經歷,她透露當年舍監是婦科醫生,非常注重學生健康,又怕女生貧血,故每星期總有一餐安排豬肝或牛肝,所以她現時最怕食豬肝牛肝。

楊紫芝稱,最初她入港大時未有何東宿舍,其後何東宿舍一開就搬入去住,笑言因為大家只玩新生,而她當時已是高班故避過一劫,不過當年玩新生都好斯文,只是請食飯、講故事或「唔畀入房」而已。此外她還可以選擇房間,選了最高層405號房。至於宿費方面,她當年因考到政府獎學金被豁免,更形容宿舍服侍「不遺餘力」,除有人打掃執床外,食飯時更有馬姐「等住裝飯畀佢哋食」。

張婉婷就難忘當年宿舍「搶gong(銅鑼)」情景,用熱水射向其他宿舍學生,最後多人跣倒要入院縫針,地板亦被熱水破壞翹起,她們要用腳踏足全晚,「踏番好」地板,後來「搶gong」亦因此改為在草地進行。她又回想當年玩新生時,要到水街買雪糕回宿舍而保持雪糕不溶,非常好玩。

※更多政經猛料、秘聞,請關注政Whats噏fb:
https://goo.gl/ndFQNz