搜查線：搵貓做生招牌　店長最怕賊偷貓

可愛有罪？不少店舖都會找飼養的貓貓做生招牌，吸引大批貓奴朝聖，但可愛外表有時卻招徠橫禍。早前，西營盤一間藥房所養的英國短毛貓女「可樂」遭人偷去，下落至今不明；北角一書局亦有小貓「福仔」及「康康」被人捉走，雖然最終回到主人身邊，但其中一隻不久因病死亡。貓店員每日迎送各式各樣顧客，難免遇上偷貓賊，店主們如何保障貓員工安全？

西營盤香港健保中西藥坊短毛貓女「可樂」，是店主李先生3個多月前，與另一隻短毛貓女「咖啡」一同買入，「可樂」的活潑性格深得店員、街坊及顧客喜愛，上月中「可樂」在店舖外被一名金髮女子偷走，至今音信全無，李希望對方將「可樂」歸還，但感機會渺茫。他慨嘆：「如果係錫佢都好！最驚係畀有問題嘅人抱走，唔知會點對佢。」

現時店內只餘下「咖啡」，但出奇地，「咖啡」沒有因「可樂」被失蹤而愁眉不展。「依家（咖啡）無人同佢爭寵，佢仲開心過以前。」為防「咖啡」成為偷貓賊下一目標，李打醒十二分精神，縮減「咖啡」活動範圍，「驚『咖啡』畀人偷走，所以唔畀佢離開間舖，就算坐喺門口，都會將佢抱返入店內。」李曾將「咖啡」帶返家中飼養，又因爭寵問題而放棄，「我屋企有養狗，會同『咖啡』打架，所以『咖啡』只可以留喺舖頭。」其店之後會搬遷，李指屆時新舖有多部閉路電視，相信可以阻嚇偷貓賊。

而北角森記圖書則飼養了20多隻貓，全是幼時被店主陳琁拾回養大，身體健康的會送朋友領養，有病或不受歡迎的會留在店內，店內的貓貓「康康」及「福仔」都曾畀人抱走，幸最終貓歸原主，但其中一隻不久病逝，令她抱憾：「『康康』腸胃有問題，要食藥先可以便便，畀人抱走後對方唔識照顧，睇獸醫都搞唔掂，最後抱返嚟還畀我，但『康康』因為食唔到嘢，瘦咗成個碼，一年後都死咗。」她指如果『康康』一直在由她照顧，一定會更長壽。

陳琁對「可樂」被偷事件身同感受，亦擔心愛貓會有類似遭遇：「香港人迷戀名種貓，我有幾隻名種貓就唔敢放喺舖頭，都係喺屋企養，驚畀人偷！偷貓人為咗佔有隻貓，就算對方係錫貓都可能會害咗佢。」

為防有人偷貓，她已於店內貼上「請勿與貓玩耍」告示，部分更掛上「惡貓」警告牌，防止有人借故親近貓貓而作不軌企圖，「其實啲貓要好長休息時間，啲客會阻住佢哋休息，我都唔希望啲人只係為咗啲貓而嚟書局。」

而大埔大德藥房飼養的貓貓「阿七」，因外表可愛，溫馴任摸，亦迷倒不少街坊，街坊April與孫女買餸經過藥房時，孫女都會過去觸摸「阿七」，「隻貓貓好乖，見到佢都開心啲。」而該店更在「阿七」睡覺時擺放告示，叮囑一眾街坊勿多手，告示包括有「『阿七』輸波，心情不佳，唔好搞佢」、「瞓緊教(覺)請勿打擾」及「此貓有毒請勿觸摸」。店員被問及是否防止「阿七」被偷走時，店員自貶「阿七」身價，望偷貓賊高抬貴手：「啲紙牌玩下啫，『阿七』係蝕本貨嚟，唔驚會有人偷，要偷由佢偷。」