搜查線：60年小巷織補檔　縫補動人回憶

今時今日，大家都愛送舊迎新。衣服破舊的話，多數人都會直接棄掉，不願再「左補右補」，令織補這個老行業逐漸式微，織補或將失傳。不過，西營盤一檔專做織補的老字號，開業至今已走過60多個寒暑，年過80歲的店東依然堅持做下去，一針一線為街坊縫補破爛的舊衣，縫補好的不僅是衣物布料，更為一件件舊衣背後的動人故事，縫合完美回憶。

今年82歲的李炳康，是李湛記織補東主，他16歲就開始做織補，於東邊街的窄巷，已經度過逾60多個年頭。織補與一般補衫並不一樣，需一針一線將破損的位置補回，十分考功夫。當年，因爸爸發生意外過世，他急於賺錢養家，不得不放棄做電器學徒的夢想，承接爸爸的衣缽。「16歲幾就已經無咗老竇，6個兄弟姊妹，計埋個老母7個人，7個人食飯，無理由唔出嚟幫補家計。」入行多年，但他從無想過放棄。「無諗過轉行呀，後生嘅時候好難搵食，做開就繼續做。」

做織補做了一輩子，他娓娓道來，舊衣背後是不少充滿愛的故事，客人想留住的不單是一件衣服，「有啲衫好古老，我叫佢唔好做，佢話唔做唔得，『我媽留畀我，我唔着但要保留番好去，一代傳一代』，好多依啲例子。」當中，亦有浪漫的愛情故事。「無幾耐之前，有位男客人堅持要整番件衫，話件衫係情人送，佢又唔係講太太，係講情人，真係好有趣。」

織補已是夕陽行業，不過原來世界各地仍然有不少忠實粉絲。「平均一日有十幾個客幫襯，冬天特別多，港九新界都有，遠至澳門、美國、澳洲、加拿大及新加坡都有人會嚟。」記者採訪當日，短短30分鐘就已經有3個客人，當中更有外籍人士。幫襯20年的熟客李太更指，「無幫襯過其他(檔)呀，已經搵到個好嘅，唔使試其他啦。」

問及入行多年的秘技，他十分謙虛，「邊有咩秘技吖，都係細心做足，慢工出細貨。」 李湛記織補甚具名氣，有人更專程到東邊街與李生拍照。「我又唔係藝人又唔係明星，影咩相啫。之後對方話唔係呀，我當咗你係明星啦，我真係臉都紅埋。」

60多年來日做夜做，度過不少困難時期，幸好有一生最愛在旁相伴。今年80歲的李太，與李生結婚接近60載，婚後嫁雞隨雞。「先生做嗰行都無辦法唔跟住，由後生一齊做到依家，大家齊齊做都開心架。」

現時李生李太已兒孫滿堂，膝下有一子兩女及兩個孫兒，不過仍未計劃退休。「10幾年前我啲仔女已經叫我退休，我話唔好呀，無嘢做好悶，唔通真係坐公園咩。做得一年得一年啦，有啲寄託好啲。」至今，李生李太仍然堅持星期一至六，上午9時至下午7時開檔。工作繁忙，豈不是沒有時間看看世界，「唔係，逢紅日我就會休息架，去旅行架喇。」

不少父母都希望子女可以繼承家業，不過李氏夫婦卻耍手擰頭。「唔想呀真係唔想，依行好辛苦，做其他嘢發展好啲，我畀佢哋讀書，咁多工好做，做依啲做咩，淘汰啦。」織補買少見少，老一代逐漸退下火線，可能有一日織補這門手藝真的會失傳。