政Whats噏：卿姐考察日本　被稱香港鐵娘子

民主黨立法會議員劉慧卿上月就帶同多名黨友去日本考察，期間同日本國會議員、日本外交部及香港駐日本經貿辦官員會面。有團員透露，卿姐去到外國依然好有江湖地位，不論都議會議員定係國會議員都好尊重佢，仲有國會議員尊稱她為香港鐵娘子(Iron Lady)添。

隨團訪日的深水埗區議員袁海文話，新一代的日本年輕人對香港的認識好少，只係覺得香港係中國的一個城市，對一國兩制無咩認識，而日本都議會議員同國會議員就相對認識香港的情況，更加對卿姐敬重有加，尊稱佢做香港鐵娘子。

講到同卿姐去考察有無壓力，團員之一鄒旻芳話，因為自己頭一日遲到，所以卿姐每日都會提早去拍佢房門，搞到佢有幾日索性提早去旅遊巴上面瞓覺，以免遲到被賣甩。除咗唔可以遲到，卿姐仲好注重團友的餐桌禮儀，不過佢哋都覺得，卿姐只係表面惡，但實質係好細心關心團友。

佢哋形容，旅程中印象最深刻的是參觀半機械化科研公司，團友黎敬瑋帶上類似電影鐵甲奇俠的腰帶，以平日4成的力氣就可以拎起幾公升重的水樽，而副主席羅健熙更試用念力操作機械臂，覺得香港可以將以上技術應用在護理業上。

※更多政經猛料、秘聞，請關注政Whats噏fb：