政Whats噏：卿姐找數　36年前吊帶look重現

立法會議員劉慧卿三十多年前任職記者時，身穿吊帶背心進行採訪為人津津樂道。卿姐早前承諾會在離開議會前穿上同一條吊帶裙現身人前，但去到最後一日開會竟然走數，她今日終於兌現承諾，着吊帶裙同黨友出席活動，唔少街坊見到佢「搏到盡」都發出嘩嘩聲，有唔少人更駐足觀看，亦有人舉起大拇指讚好。

卿姐話，首次着同一條裙現身已經係1980年，要着番30幾年前件衫都唔係咁容易，她仲挑戰大家，話80年代件衫真係無邊個可以着得到，自稱好環保咁話。卿姐着起條裙顯得非常興奮，仲拉起條裙尾轉咗半圈添。

被問到着吊帶裙要唔要節食，她大叫「黐線」，反問「我好肥咩？」，又笑稱要同黨友今晚着吊帶裙去蘭桂坊，接觸吓唔同街坊。被問到咁多年如何保存呢條裙，卿姐話只係放喺衣櫃內，無特別方法保存，而且呢條裙都唔係咩嘢名牌，依家係夏天，穿起呢條吊帶裙感到特別涼爽。

※更多政經猛料、秘聞，請關注政Whats噏fb：

https://goo.gl/ndFQNz