政Whats噏：卿姐找数　36年前吊带look重现

立法会议员刘慧卿三十多年前任职记者时，身穿吊带背心进行采访为人津津乐道。卿姐早前承诺会在离开议会前穿上同一条吊带裙现身人前，但去到最后一日开会竟然走数，她今日终于兑现承诺，着吊带裙同党友出席活动，唔少街坊见到佢“搏到尽”都发出哗哗声，有唔少人更驻足观看，亦有人举起大拇指赞好。

卿姐话，首次着同一条裙现身已经系1980年，要着番30几年前件衫都唔系咁容易，她仲挑战大家，话80年代件衫真系无边个可以着得到，自称好环保咁话。卿姐着起条裙显得非常兴奋，仲拉起条裙尾转咗半圈添。

被问到着吊带裙要唔要节食，她大叫“黐线”，反问“我好肥咩？”，又笑称要同党友今晚着吊带裙去兰桂坊，接触吓唔同街坊。被问到咁多年如何保存呢条裙，卿姐话只系放喺衣柜内，无特别方法保存，而且呢条裙都唔系咩嘢名牌，依家系夏天，穿起呢条吊带裙感到特别凉爽。

※更多政经猛料、秘闻，请关注政Whats噏fb：

https://goo.gl/ndFQNz