陳恒鑌執死雞掟午餐肉　長毛還拖飛中馬逢國

建制派今早集體離場引發流會，以示不滿青年新政兩名議員拒絕為早前宣誓涉辱華一事道歉，其後在會議室外回應事件，卻遭議員梁國雄(長毛)「突襲」，手持午餐肉擋在鏡頭前打斷發言，眾建制派議員紛紛指罵長毛，場面混亂，期間雙方更互掟午餐肉，「亂上加亂」，結果體育、演藝、文化及出版界馬逢國不幸「中頭獎」，但原來連累馬逢國中招的是民建聯的陳恒鑌！

長毛趁建制派發言時，手持一片片午餐肉走到咪兜前高呼「(工聯會前議員)王國興話午餐肉啊！你地流會啊！」，批評建制派拖延會議，工聯會郭偉強就面露厭惡之色輕輕推開長毛，更稱：「唔好玩啦，整到人啦！」

但長毛未有理會，並走到咪兜前，將午餐肉掟向咪兜方向，站在一旁的陳恒鑌從地上拾起午餐肉，擲向長毛，長毛隨即嬲爆問「邊個掟我？我掟返佢哋！」並反擊將午餐肉掟向建制派，結果馬逢國不幸「中招」，長毛掟出的午餐肉擊中其額頭，再反彈跌落地上，馬被掟中後一臉無奈，手掩額頭。