搜查線:碩士生賣閃卡 替客人尋找童年回憶
談及兒時珍寶,一蚊抽一張的閃卡必定佔一席位,加上當年日本動畫大熱,即使小時候零用錢有限,仍有不少人「死慳死抵」都要儲齊一套。一張張卡紙上印有不同角色,一閃一閃猶如活現動畫內的精彩場面。美國一家拍賣行日前拍賣一張於1997至1998年送給插畫比賽的得獎者的「寵物小精靈」閃卡,結果由一名來自香港的收藏家出價約43萬港元,投得心頭好。閃卡熱潮再現,香港近年就熱炒殿堂級動漫「龍珠」閃卡,身價大幅跳升至數千、甚至過萬港元,而且「有價有市」,年中不乏收藏者問津。

隨着時代變遷,一張張的閃卡不斷褪色,童年回憶卻因此變得更加珍貴。當年有儲閃卡的你,閃卡現在「去晒邊」?又願意花多少錢買回一張狀況良好的龍珠卡?1990年出生的Anthony,在2年半前開始從事收藏品生意,他表示,龍珠閃卡為70至80後的童年回憶,現時這班人大多已「上岸」,有能力及餘錢買回舊玩具,「當香港地要成萬蚊一呎地,好多時大家嘅閃卡喺搬屋時就唔要,或者早早被父母丟咗,就算留得低都會有耗損,到依家呢刻要搵質素好嘅卡好難,所以會咁貴。」

雖然近年推出了復刻龍珠閃卡,但Anthony指出,顧客多認為新卡質素不及舊卡,因此更願花錢買舊卡,情況就如同黑膠唱碟,「黑膠碟嘅復刻碟,新出嘅只要500、600蚊一隻,但因為唔係由母碟印出嚟,所以音質較差。依家啲閃卡唔夠靚,復刻版同以前唔同樣,變相啲人更加肯出錢買舊閃卡。」

除此之外,閃卡價錢還取決於不同因素。香港天氣潮濕,而孩童儲卡時少有放在卡簿內,閃卡容易變黃變皺,Anthony指此類卡片可能只達市價的1成,「罕有嘅龍珠卡,有啲係幾萬蚊一張,如果普通啲嘅『暗閃』「激1」或「激7」,就幾百至幾千蚊都有,視乎質素.....譬如『暗閃』『激1』,一對係4000蚊,保存得唔靚,就得番400蚊左右。」他補充指,「閃中閃」或「暗閃」卡片都可撕開有另一面,過往少有小朋友禁得住好奇心不撕膠貼,如能保存未開,卡片就更罕有了。

值得一提的是,一些非官方發行的閃卡,例如隨零食附送的「翻版」,因發行量屬未知數,價格亦會較高,而儲齊一整個系列的閃卡身價亦不少,但當然炒價不及正版。採訪當日,儲閃卡已逾10年的Joe,就向記者展示6張香港特別限定的龍珠卡,表示它們的市價至少2000港元。

「唔係好多套動畫可以去到龍珠呢個級數。」事實上,Anthony本為港大碩士生,投身收藏品生意全為興趣,「作為90後,呢一代好少人好花心機落收藏品度,但市場好多人玩緊,而競爭相對係低,我覺得有得做。」這個決定能獲得家人支持,全因開店宗旨,是幫香港人收藏回憶,「成日講集體回憶,除咗鐘樓等等,都希望可以保留番呢啲舊嘢。」他又形容鑑定、估價等等是「一路做一路學」,並非單純炒賣,是靠知識投資。

---------------------------------

想聽歌?想睇MTV?想了解本地Indie Band資訊,快啲click入「聲大夾樂」專頁:http://on.cc/musicon