詐彈驚魂：楊洛婷與夫即攞車走　聞嘭然巨響

海港城今午發生「詐彈」驚魂，當時在上址工作、懷有5個多月身孕的藝人楊洛婷，與樂隊Dear Jane主音老公Tim亦為「受驚者」之一。楊憶述事件時仍猶有餘悸，指當時一路有警察到場，着大家盡快離開，她遂與老公「攞車走」，其後便聽到「嘭」一聲。被問及有否因此嚇倒腹中胎兒，她指「應該冇事，OK」。另外，現場有帶着兒子疏散的市民亦稱，「炸彈？真係聽都未聽過喎！」故她未有感到太過驚慌。

藝人楊洛婷今午與樂隊Dear Jane主音老公Tim在尖沙咀海港城工作，期間遇上「詐彈」驚魂，楊洛婷事後接受電話訪問時火速報平安稱：「冇事﹗」並憶述警方疏散人群時的經過，指「一路有警察到場，通知商戶同現場人士話疑似有爆炸品，叫大家盡快離開。」她聞訊後即孖老公取車走人，「知道後即刻上停車場攞車走，之後就聽到『嘭』一聲巨響，我哋仲擰轉頭望有冇煙，但睇唔到有煙，亦都唔知咩事。」被問及「巨響」有否嚇倒腹中BB，楊表示「應該冇事，OK」。她又透露，夫婦二人不時到上址shopping，「呢輪成日去睇BB嘢」，而離開現場後，她便即與老公到另一個地方撐枱腳，兼與老公合照報平安。

現場另有帶着兒子疏散的趙先生稱：「炸彈？真係聽都未聽過喎，亦都聽唔到爆炸聲」，故未有感到太過驚慌。另一名當時在場的吳太則表示，得悉事件後「都有少少驚，所以即刻走」。