搜查線：漫畫收書佬 為助基層跑盡港九
20170608
東網電視
更多新聞短片
平日阿Wing走訪各區回收漫畫，只靠數個紅白藍袋及一架手拉車走天涯。(朱偉坤攝)
隨着年月過去，那些年每天翻看的漫畫書，今時今日可能只在家中封塵又「阻碇」，惟香港的二手漫畫店愈來愈少，願意走遍各區上門收漫畫的「收書佬」，更是絕無僅有。幸有一名漫畫店主，8年來四處走訪，將一本本瀕臨被棄的實體漫畫回收拯救，熟客皆稱他為「漫畫救世者」，由於太多客人分毫不收、免費送贈漫畫書，店主決定「取諸社會，用諸社會」，不時以義賣形式出售漫畫，再將收益悉數捐予深水埗明哥，助人之餘，也令到場的「識貨之人」因而覓得心頭好。
50多歲的羅樹榮(阿Wing)，自小喜歡港漫，亦有收藏大量諸如《小傻仙》、《龍虎門》、《中華英雄》等漫畫。8年前眼見一本本風行一時、曾經被主人珍而重之的漫畫書，因不同原因要被棄置，而實體漫畫店愈見式微，他終將興趣作為職業，開店回收二手漫畫，「希望大家都仲可以有實體漫畫睇，唔係就再冇地方賣啦......早幾年仲有200幾間(漫畫店)，依家一眼睇晒，得返10零間。」
「漫畫救世者」的使命，是為舊書找到新主人，不過上門回收，對身材並不輕盈的阿Wing來說，其實絕不容易。平日接到柯打，他都是單人匹馬出動，走訪各區、「上山下海」他都不會托手踭，一架手拉車、數個紅白藍袋就是他的全副裝備，元朗、鴨脷洲，甚至梅窩、坪洲都難不到他。阿Wing表示，數天前更有人一口氣捐出一萬本舊漫畫，平日如能力許可，會乘搭公共交通工具，如漫畫數目太多就會電召貨車協助運書。
踏入6月，天氣酷熱非常，日前阿Wing前往西貢井欄樹收書途中，上落斜路時差點中暑暈倒，「最遠試過去到澳門收，有成30個紙皮箱，要搭躉船返嚟，係差在未搭過飛機咋。」採訪當日，記者跟隨他由位於新蒲崗工廈的漫畫店出發，到秀茂坪一屋苑回收4大袋用作義賣的漫畫，「朝早收Call，晏晝得閒就去收，一袋成20磅，你話重唔重吖？」
只要漫畫是客人送贈，不論是否罕有或貴價，阿Wing都會用作義賣，每儲夠一定數量就會舉行義賣，至今已是第3次。今次成功籌得4千多港元，阿Wing表示全賴有心熟客一呼百應，「太多人送書，唔想白收人哋，所以咪變咗義賣，大家出一分力......因為係送，更加冇理由叫人送埋上門，咁咪佢哋出書我出力，做善事就係咁簡單。」
其中一名到場選購漫畫的郭先生，表示是首次到場，自小已開始睇漫畫，當日購入了4套日漫，滿載而歸，「其實一早睇晒，但想搵返一套嚟儲...... 啲電子漫畫想翻睇時會好麻煩，所以會買實體。」他形容義賣是「雙贏」活動，「老細幫到我哋，又幫到有需要嘅人，之後如果有，都會繼續過嚟！」
-----------------
《魔法軍團Z》創新自由組裝機械人大戰！
日系機甲戰棋手機遊戲《魔法軍團Z》好評配信中！