搜查線：字粒逐個執 活字印刷指尖間消失
20170815
東網電視
更多新聞短片
活字印刷在市場已接近完全淘汰，堅持這門手藝的人，亦買少見少。
科技日新月異，不少傳統行業被取而代之，「執字粒」的活字印刷為其中之一。中上環一帶高峰期曾有逾200間活字印刷公司，惟連鎖式經營的印刷公司及柯式印刷的出現，令區內活字印刷公司一間又一間相繼倒閉。有行內的老師傅，積極將活字印刷推廣，希望將這門快消失的手藝活化。
「活字印刷已經被市場淘汰，依家香港無一間公司仲可以做活字印刷，如果唔係有懷舊保育熱潮，呢樣嘢可能已經消失咗。」50後的印務公司老闆任偉生，7、8歲就開始接觸活字印刷，數數手指，入行至今逾50年。說起活字印刷，就滔滔不絕。
他訴說，活字印刷於戰後興起，戰後有不同行業開始興旺，信封、信紙及卡片等成為必需品。「當年印刷品需求好大，洋行嘅合同、單據；零售，好似上環南北行嘅發票都要打印，50、60年代經濟起飛，係活字印刷全盛時期，當年呢行好搵錢。」
現時要打印，按一個制就可以，不過當年印刷就十分講求技術。「好考功夫，係一門手藝，好似砌積木咁，要逐粒逐粒字放落去，啲字粒用耐咗會蝕，有高有低，壓力要啱啱好，先會無咁傷啲字（粒），可以用耐啲。」
然而，好景不常，70年代後柯式印刷日益流行，工序較活字印刷簡化、效果亦較好，愈來愈多人採用。不少印刷公司轉做柯式印刷，令鑄字公司愈來愈少人光顧。中環的鑄字公司相繼倒閉，最後一間亦於1995年結業。因為鑄字公司結業，印刷公司再無字粒補充，只好全部轉做柯式印刷，活字印刷亦因此被淘汰。
「『瓜打』（造出空格的工具）用嚟做字距，鉛片用嚟做行距。」任偉生一邊說着活字印刷的歷史，一邊展示當年的相片，可感覺到他為自己的專長而驕傲，可惜，活字印刷這門傳統工藝已步入夕陽。「大約2000年，我哋已經無再做活字印刷，因為配唔到字，亦都無人再可以用字粒整一個版去生產。以前中環威靈頓街到上環新街有超過200間活字印刷公司，依家地舖嘅印刷公司，5隻手指數得晒。」他嘆道，科技進步，令不少傳統行業消失；集團式經營亦扼殺了不少家庭式經營的印刷公司。
現時，其公司已經不再承接活字印刷的訂單，不過他們不時會在舖內舉辦工作坊，希望可以向行外人推廣活字印刷。對於行業被淘汰，甚至被遺忘，他一臉感慨：「印刷術是中國四大發明之一，我哋呢代老去，就唔會再有人識，要去博物館先會睇到。」
---------------
《魔法軍團Z》創新自由組裝機械人大戰！
日系機甲戰棋手機遊戲《魔法軍團Z》好評配信中！