網民熱話：司機撞狗冇例管　聯署修例惹熱議

踏入動物診所，消毒藥水味撲鼻而來，兩旁狗籠內傳出不絕的叫聲，一隻劈頭有6吋長鮮紅色傷疤的「撞車狗」lucky妹一瘸一拐，四肢均有手掌大損傷。義工輕撫牠的傷痕嘆道：「牠叫做lucky妹，因為牠已經是撞車狗中最幸運的一隻。」走進診所深處，才發現這些不幸在公路上被車輛或有意，或無意輾壓過的毛孩不計其數。

現時法例規定，司機如撞到馬、牛、驢、騾、綿羊、豬或山羊，必須停車，動保團體毛孩守護者前日（9月3日）發起十萬人聯署行動，推動修改《道路交通條例》，將貓、狗、猴子加入到條例的涵蓋範圍之中，希望大眾及駕駛者能正視及尊重動物。流浪貓狗和人一樣，同樣是活生生的生命，在一周接獲5宗狗隻被車輾斃或重傷事故後，義工深感法律條例落後。她稱，甚至曾有人目擊小巴司機蓄意車死狗隻，之後仍可若無其事，認為現時無法例懲治撞死流浪貓狗不顧而去的司機。

「我哋去到站頭搵到個司機，佢話：『車到狗咋嘛？我以為車到人呀你哋咁大陣仗！』」義工阿琪最痛心的一次經歷，是拯救一隻撞車狗，「就到診所時隻狗突然間唞大氣，失禁，嘔血，喺我大脾上走咗！」另外，亦有乘客曾目擊紅VAN司機輾過路中流浪狗，隨後大呼：「唉！真係車到，我都估會撞到㗎喇！」　

獸醫Ronnie亦大嘆撞車狗最難救：「好多時候嚟到見到個肚漲晒，攞枝針一抽出嚟全部血嚟，最多打開個肚睇下出血嘅地方，但好多時候都太遲，救唔返。」

「你鍾唔鍾意貓狗都好，你唔好傷害佢，佢都係一條生命，有感情！」聯署行動發起人之一Kent坦言交通意外有時候難以避免，但一念之間手執生殺大權，若司機撞狗沒有不顧而去，而是停下來為受傷動物尋求協助，牠們或者不至於失救至死，就算當場輾斃，花費少許金錢為其善終，亦是作為有良心、有道德的人的一個負責任做法。

網民對「我支持改動道路交通條例，保障弱小生命！」號召一呼百應，聯署短短兩日已獲得逾萬人支持及近8千次分享。Kent希望將行動推至立法層面，並直言要有足夠民意，才能令政府感受到修例的急切性。

東網記者向警方查詢有否因車死動物或狗隻而被檢控的紀錄，警方發言人回應指沒有備存相關數字。發言人又指如接報在馬路上發現動物屍體，會派巡邏人員到場了解，如相信事件沒有可疑，會交由相關部門人員安排將屍體移走及清洗受影響的路面。

網民有話說：

C.k Kenny：我揸車搵食，有時都會見到有動物行出馬路，不過只要揸車時留心啲，安全啲，我絕對相信好多時可以避免撞到動物。

Lam SindyJulia：香港政府到現在仲係用緊60、70年既法律治港，你哋有阿媽生，佢哋（動物）冇嗎？點解永遠都要動物來遷就人類呢種自私自利嘅生物。

Ywl Lap：其實不如改下例！如果貓狗亂咁衝出馬路，主人應該要負上刑事責任！駕駛者其實都好無辜，大家諗嘢唔好咁一面倒，有揸過車都知部車唔係話停就停！最大責任應該係主人同棄養者！

黃祖名：點解貓同狗係無？香港人鍾意養牛養豬？

※緊貼網民熱話，掌握最熱話題，請關注網民熱話fb：