政Whats噏：葉詠詩女學小提琴　學到一殼淚

又到家長幫子女報讀學校嘅季節，唔少家長都會要求子女學樂器，以便寫入履歷表。香港小交響樂團音樂總監、兼著名指揮家葉詠詩，出席香港潮屬社團總會婦女委員會的午餐時分享自己嘅經歷，提醒家長「勉強冇幸福」，佢話，自己嘅女兒小時候練小提琴，練到小提琴滿是淚痕，令佢認命明白唔可以逼女兒學琴。

葉詠詩出生於音樂世家，佢嘅爸爸葉惠康亦係著名音樂教育家，佢話，為咗避免自己嘅父母煩自己，都曾經喺仔女細個嘅時候，要求佢哋學一兩樣樂器，「如果唔學，我爸爸媽媽唔放過我」，不過兒子就唔鍾意睇譜同練琴，女兒睇譜亦都有障礙。她曾經試過陪女兒練了4小時小提琴，結果女兒喊，佢就忟，小提琴上滿是淚痕。葉詠詩就明白到，唔可以勉強小朋友做唔鍾意嘅事，佢個仔依家係做動畫，女兒就學時裝設計，都係鍾情藝術。

葉詠詩話，依家嘅香港家長只係想小朋友學樂器，但就唔想小朋友讀音樂，甚至有好幾個家長嘅子女到15、16歲好鍾意音樂，但該幾位家長就去拜託葉詠詩嘅爸爸，勸佢哋嘅小朋友唔好學音樂。佢話，家長應留意小朋友嘅興趣去發展，唔好強逼小朋友學唔想學嘅嘢。