新iPhone深夜發布　商戶料炒家每部賺$3000

蘋果公司深夜將發布新iPhone，3款新機已率先在網上曝光，當中包括10周年紀念旗艦機iPhone X，售價更可能高達1萬港元。炒家聖地旺角先達廣場正經歷風暴前的寂靜，商戶估計新一波炒期起碼維持1個月，已準備幾百萬港元資金收購新機，估計旗艦機收購價屆時會較官方價高出3成，即炒家最起碼每部可賺3000港元，當中特別色炒價更可能翻倍。有用家則打算在新機推出後換機，又稱售價近萬港元可以接受，至於會否炒賣則視乎能否抽到。

i世代電訊負責人勞景滺笑言，這2個月是不同品牌手機的發布期，自上月起生意已轉趨淡靜，以iPhone7為例已跌價1成，最貴的僅6800港元，日銷售量只有十部八部，「個個都觀望，我哋都盡量少存貨！」而新機炒賣方面則看好旗艦機，「特別頭兩三個禮拜，炒賣價一定去到萬二、三，視乎貨量，分分鐘炒足1至2個月！」目前已有近20個熟客訂機，「都係忠誠狂迷，唔理幾錢都要，零售價都係收購價再加1成到」；至於批發價只會每部賺2、300港元。

勞斷言新機必然有炒賣空間，「依家都成咗世界級盛事，成個蘋果節咁，一年一度！」當中以特別色及128GB最具炒賣價值，「依家傳有紫色，如果有透明殼仲爆！」數碼匯的負責人阿勇則稱已準備增加一半人手，屆時會有部分員工企街收貨，策略與往年相若，收購的手機會即日轉手，「個價一定係(隨時間)向下，貴過公價嘅嘢都唔應該囤！」

使用iPhone6+已經3年的汪先生則稱，打算新機推出後換機，不過會選擇電訊商的月費計劃出機，至於會否選擇旗艦機則「睇下靚唔靚仔」，而售價近萬他亦指可以接受。汪續指多年前亦曾炒賣過新機，小賺6000港元，今次若好手氣抽到新機亦會放售。