政Whats噏：46歲單身麥美娟　生日願望係...

立法會今午(1日)會繼續辯論由政府就高鐵西九龍站實施一地兩檢提出的無約束力議案，而早上工聯會多個工會到立法會示威區請願，批評泛民拉布，要求盡快通過一地兩檢議案。到示威區撐場嘅工聯會議員麥美娟(Alice)就畀人爆佢今日牛一，連生日都要喺立法會到過，佢嘅生日願望係啲乜？

Alice話今年嘅生日願望當然就係快啲通過一地兩檢方案，而今晚收工都係返屋企，同姪女一齊慶祝。唔知Alice係咪想通過咗議案，今晚就可以順便慶祝埋呢？至於仲係單身貴族嘅佢，今年有無意思搵番個男朋友，佢就話有屋企兩隻狗仔已經好足夠。真係兩個就夠晒數？Alice話兩隻愛犬都係狗囡，都係「麥小姐」跟佢姓，一隻叫「麥糖」，一隻叫「麥棗」。兩隻狗嘅名都咁甜，Alice生活都一定好Sweet啦！

另外，工聯會一行20多人請願要求立法會盡快通過一地兩檢方案，指高鐵通車後可強化與內地的聯繫，認為如何落實一地兩檢方案才是重點，且要避免將其政治化、陰謀論化。團體「政中香港人」亦有到場請願，批評泛民拉布，指拉布議員「白出糧」，「係又拉唔係又拉」不顧民生事務。