政Whats噏：譚靜芝爆妹妹歌唱天賦更了得

眾所周知，大律師公會前主席譚允芝彈得一手好鋼琴，原來佢嘅家姐譚靜芝亦係一名音樂高手。身為基督徒嘅佢同音樂結緣數十載，退休後仲喺工廈單位成立資源中心，將珍藏成千上萬嘅樂譜同書籍公諸同好，繼續發揮佢藉音樂嚟宣揚宗教訊息嘅熱情。

雖然兩姐妹都熱愛音樂，但譚靜芝強調自己並非出於「音樂世家」。佢話爸爸喺家中自學二胡，又購置好多粵曲唱片，然而教會和學校嘅音樂薰陶，較爸爸來得更大。佢話中樂對於憂怨自憐嘅情緒表達十分出色，但都唔及得西樂咁觸動人心，所以佢除咗參加教會合唱團，又報讀中文大學音樂系，繼而負笈美國修讀合唱指揮同管樂指揮，回港後喺神學院任職聖樂系主任直至退休。

至於妹妹譚允芝就曾經同佢參加同一間教會嘅合唱團，但妹妹後來往法律界發展，佢就繼續喺音樂領域鑽研，佢仲話妹妹不但彈得一手好鋼琴，論歌唱天賦更加了得。

由大學時代至今逾30年，譚靜芝喺海外收集樂譜嘅數量多到難以計算，但係佢都好努力咁將樂譜分門別類，連同宗教相關書籍一併擺放喺資源中心。不過，由於佢遇過多次樂譜「有借無回」嘅慘痛經歷，所以愛好樂譜嘅人士去資源中心可以影印樂譜，外借就唔方便喇！