政Whats噏：周永康繫獄每日反思　之鋒懶理

終審法院日前決定受理「雙學三子」黃之鋒、羅冠聰同周永康衝擊政府總部一案嘅終審上訴許可，定於明年1月16日審理，而繼黃之鋒同羅冠聰早前獲准保釋候訊，服刑80多日嘅周永康亦獲批保釋以等候上訴，佢今日(8日)剖析自己嘅心路歷程，透露喺獄中每日都會反思，又自爆回家後有好多事情都需要適應，舉例指監獄燈光較昏暗、家中廁所使用坐廁等，相比之下，服刑69日嘅黃之鋒聲言到監獄係「考察」，又表明回家後唔會再摺被，似乎身陷囹圄一段時間，未予人有明顯嘅改變。

黃之鋒、羅冠聰同周永康喺2014年9月26日晚上衝擊政府總部東翼前地，去年被裁定非法集結等罪成立，及後3人遭改判入獄6至8個月，黃之鋒等3人前後腳獲批保釋等候上訴，周永康今日一連出席2個電台節目，大談自己喺獄中生活同家人重聚嘅點滴。

暫時重獲自由嘅周永康話依家很多嘢要適應，舉例指家中廁所使用坐廁，而相比監獄燈光較昏暗，回家後覺得家中燈光光猛，佢笑稱近視同散光都有加深，要去驗眼。

曾喺獄中服刑2個多月嘅周永康又話，自己喺獄中服刑80多日，每日都會反思，並指愈來愈覺得要做一個覺醒嘅人，唔好被表象蒙蔽，佢又提及監獄內嘅營養餐相對清淡，故現時較入獄前瘦咗3至4公斤，監獄牆上雖然貼出「食物金字塔」海報，但發現同所食嘅營養餐單水果分量不符，就此，佢曾向職員多次詢問係由誰人制定呢個餐單，但未能得出答案，最終該海報更消失咗，佢對此感到詫異。

相比之下，服刑時間較周永康略短，較早保釋候訊嘅黃之鋒，接受傳媒訪問時以「考察」形容被囚禁，又質疑監獄係一個冇選擇、冇獨立思考，只能夠聽話嘅地方，加上佢事先張揚，回家後唔會一如喺監獄中摺被，似乎懶理其父親曾「投訴」佢唔摺被，黃之鋒坐監後有冇覺今是而昨非，答案可謂不言而喻。

此外，對於周永康喺電台提及多項監獄情況，懲教署發表聲明不點名反駁周永康，指「署方唔會因應個別人士嘅選擇或偏好而制定相關措施」，強調會以公平、合法同合理原則，確保每名在囚人士獲得適當待遇。署方並指膳食標準分量同營養成分均由合資格營養師釐定，並獲衞生署認可。