跑街馬唔飲酒　改配珍奶鮑魚　專家：難消化

「全城街馬」又嚟喇！第5屆的「香港街馬@九龍」將於明年2月25日舉辦，而今屆街馬更大玩美食，沿途水站會為跑手供應一口鮑魚、一口牛柳粒和珍珠奶茶等。不過阿媽教落「食飽唔好跑」，依家仲要邊跑邊食，又有冇問題呢？

浸會大學體育學系副教授雷雄德接受《港呢啲》訪問時表示，當中問題不大，例如邊跑邊飲珍珠奶茶，相信一般成年人都能應付，惟可能部分人會不習慣，「有啲人唔習慣一路跑緊，戥吓戥吓去食，或會增加骾親風險」！

他續指，非職業跑手邊跑邊食，並不會對跑步成績構成太大影響；不過，對分秒必爭的精英組跑手來說，影響則較大，「當你食咗難消化嘅嘢，譬如鮑魚或者蛋白質好豐富嘅食物，會消耗咗部分血液去消化，間接影響腳步血液嘅供應，從而令跑步能力下降！」

不過，主辦單位公布賽事詳情時表示，外國不少馬拉松同樣有供應食物，跑手亦可自由選擇領取美食與否。

---------------

《港呢啲》：大事小事騎呢事，東網電視嚴謹選題，輕鬆製作！