你要知：行山遇6大野生動物　專家教點執生

踏入秋冬，天氣涼爽，為行山的旺季。行山親親大自然，不時都會遇到野生動物。然而，香港人居於都市，甚少遇見野生動物，如果見到野豬、箭豬、猴子、蛇及牛，甚至赤麖出沒，應該如何是好？攀山專家親授6大應對方法，教大家如何與野生動物共處，開開心心行山去。

1. 野豬

注意！近日本港不時有野豬出沒，由於野豬身形龐大又有如刀般的獠牙，攻擊力強，嚇怕不少行山客。「其實野豬唔係想像中咁兇惡，正常就唔會攻擊人。」攀山專家鍾建民指，野豬會攻擊人，只因大家騷擾了牠們的居所，野豬父母要保護牠們的小朋友才會作出攻擊。

要避免誤闖野豬住所，鍾表示，可留意地上的痕迹及氣味。「野豬想搵食物，就會用牙鏟起啲泥，會拖咗條路出嚟。另外，佢哋好大陣味，似豬味，你聞到就要小心。」野豬一般於黃昏出動，遇到最緊要鎮定。一旦野豬作出攻擊，要盡快離開地面，可爬上石頭或者樹。因野豬不會向上攻擊，只會向前衝。

2. 箭豬

相對野豬，箭豬身形較細，攻擊力相對較低。鍾笑指，「有啲人話箭豬會放箭射你，其實冇依回事。」箭豬若被騷擾，會如孔雀開屏般，身上的箭會豎起，不過不會攻擊。鍾強調，香港愈來愈少箭豬出現，雖然攻擊力低，體積細，但切忌騷擾牠們。

3. 猴子

香港行山客最常遇到的野生動物，猴子一定名列榜首。「依家啲猴子好惡，用好兇狠的態度，齟起隻牙嚇你。」鍾指，要避免被猴子攻擊、搶食物，首先切忌餵食，將食物收好，並且不要於猴子面前進食。另外，盡量不要單獨行山，「佢哋見你人少會蝦你，聯群結隊襲擊你，搶食物。」此外，不少行山人士會用行山杖引開或拍打猴子，但猴子數目眾多，惹怒牠們會向人作出集體攻擊，所以行開較為明智。

4. 蛇

蛇跟大部分動物一樣，不會刻意攻擊人。多數被蛇咬的個案，都因為行山客不少心踩到蛇，令蛇作出攻擊。要避免被蛇咬，走入密林及草叢時，可製造多一些聲音。「蛇怕聲音，好多時聽到聲就會走，大家可以搖一搖樹枝、開收音機，或者刻意用行山杖製造聲音，拍下周圍啲樹。」因為蛇的顏色比較深，難以看見，夜晚行山要特別小心。

若被蛇咬，最好立即用手機拍下蛇的樣子，到醫院求醫時，可就蛇的種類作出對應的治療。另外，切勿用山水洗傷口，因可能會令傷口進一步感染。

5.牛

牛一般好友善，但同屬野生動物，最好不要近距離接觸。「見到有唔少小朋友會行去搣佢耳仔，其實好危險。你唔知佢幾時發惡，如果用角撞到你大動脈會死人，唔好輕視。」此外，除了行山客，露營人士亦需將食物收好，避免牛隻闖入營內。

6. 赤麖等較罕見動物

如果遇到罕見野生動物，切勿捕捉或打牠們，可以遠距離影相。香港大部分野生動物威嚇性低，好純樸，不會刻意攻擊人。所以，要保護自己，其實不需要理會野生動物，只要不騷擾牠們，自然不會被攻擊。