政Whats噏:莫嘉嫻自爆如果唔轉會就做OL

20171119
東網電視
更多新聞短片
莫嘉嫻(後排左)加盟白鴿黨後,喺社民連會慶重遇卿姐(後排右)。(劉慧卿fb)

民協前主席莫嘉嫻正式加盟民主黨(白鴿黨)後,喺早前嘅社民連會慶,重遇一早已經搵佢入黨嘅白鴿黨前主席劉慧卿(卿姐),莫嘉嫻回覆查詢時自爆,如果唔入白鴿黨,可能會做OL!

莫嘉嫻回憶起加入白鴿黨嘅經過時指,退出民協後,曾經做過OL一段時間,如果唔係得到白鴿黨嘅賞識,都未必會繼續從政,可能會繼續做OL,好多謝該黨從來都冇放棄繼續邀請佢加盟,尤其係卿姐、立法會議員黃碧雲同胡志偉。

至於依家轉去九龍東幫手,而唔係留喺一直做地區工作嘅九龍西,莫嘉嫻就話,係畀自己重新開始,忘記背後,九龍東好多新人,白鴿黨希望都有多啲中層幫手帶下新人。至於日後會否出戰立法會,佢就話太長遠,依家都係做好地區工作,日後係點,白鴿黨同佢都係開放嘅。

卿姐喺社交網站上載與莫嘉嫻及莫嘉嫻女兒嘅合照並留言,話熱烈歡迎莫嘉嫻加入,希望合作愉快。睇嚟莫嘉嫻呢個新開始,都相當多黨友錫住佢!