政Whats噏：開App上fb　教港青認識大灣區

政府積極配合大灣區城市群發展規則，以帶動經濟發展，然而一項調查發現，高達55.2%受訪青年表示未曾聽過有關發展，同時更有59.7%居粵港青對呢項計劃一無所知。點樣填補呢個空白？梗係搵啲貼近年輕人玩意嘅嘢先得喇！

由香港廣東青年總會(總會)、明匯智庫、香港樹仁大學同廣東省社會科學院等機構合作，喺今年6月起以電話訪問方式隨機抽查，訪問咗833名青年，包括香港青年同喺廣州工作或讀書嘅香港青年，佢哋有60%為大學生，其餘40%係中學生，男女比例各佔一半。

鑑於調查結果發現港青對大灣區缺乏認識，當然要諗下計喇！總會主席曾智明話會搞一系列嘅活動推廣，總會常務副主席郭基煇話會開設手機App、Facebook專頁等平台提供資訊，除咗介紹大灣區為香港帶來嘅機遇外，亦會介紹各城市「好玩好食」嘅旅遊熱點。

兩地交流都好重要，總會執行主席霍啟山就話依家正籌辦粵港澳大灣區青年人嘅足球交流賽事，希望透過多個新穎方式吸引香港青年留意大灣區發展。