搜查線：老闆心臟病去世　姨甥接手難抵貴租結業

屋邨文具店曾經是學生放學最愛流連的地方，不過時代轉變，一間又一間相繼倒閉。香港仔一間開業接近30年的文具店，老闆數年前工作時突然過身。老闆娘痛失丈夫，但為延續夫婦倆的心血，與姨甥合力堅持下去。然而，因租約期滿及加租等問題，最後亦逃不過結業的命運，新一年的元旦日便是玩具店營業的最後一天。

位於香港仔的萬昌玩具屋，由張氏夫婦打埋，陪伴香港仔一班80、90後成長，文具、精品包羅萬有。可惜，老闆張生3至4年前，工作時因心臟病發突然過身。老闆娘張太既要承受喪夫之痛，亦要單獨撐起玩具屋，一度打算結業。幸好姨甥辭去工作，希望保住老闆多年來的心血。

「以前我舅父入貨，其他嘢都係佢負責，舅母負責賣嘢、收錢，舅父唔喺到，對佢影響好大，當時有諗過結業，但我覺得好可惜，所以同佢一齊做。」姨甥陳澤民指，張氏夫婦將一生心血投放於玩具屋，全天候工作，只會於農曆新年休息兩日，不捨他們的心血付諸流水，所以辭去工作，撐起玩具屋。

然而，時代轉變，今時今日的小朋友都不再流連屋邨文具店，加上舖租愈加愈高，令屋邨文具店走上絕路。「依家啲小朋友好多都攞住個手機玩，唔同以前咁鍾意買玩具，依類型嘅店舖，其他人覺得無需要。」陳指，香港仔賣精品的店舖，好可能只剩他們一間。不過，因為人流少、舖租雖然只是稍微增加一成多，已經「頂唔住」。「舅母一定更加唔捨得，但佢都知生意點，叫我計掂條數先，我決定。」

玩具屋宣布結業後，不少街坊都專程到場支持，買些東西，留下最後的回憶。「有啲媽媽，佢小朋友嘅時候已經喺度買玩具，依家帶埋個仔嚟，感覺好得意。入得嚟都係街坊，大家有一種微妙嘅關係。」

「以前細細個就幫襯，愈嚟愈少屋邨文具店，知道結業好唔捨得。」姜小姐更特意，帶同小朋友到玩具屋選購玩具。學生王小姐及黎小姐就指，屋邨文具店可以找到不少大型書店沒有的精品及人情味。

陳表示，現時未有下一步打算，結業後會將貨尾放上網賣。希望將來可以找到一個租金較相宜的地方重新開業，延續店主夫婦的心血。玩具屋充滿店主夫婦甜蜜的回憶、記載一眾街坊的快樂童年，不過時代的巨輪並沒有因此停下來。租約期滿、加租及人流大跌，萬昌玩具屋陪伴街坊過最後一個聖誕後，亦結束其最後一頁。