政Whats噏:蕭炯柱率視障童演出 感動高官

20171224
東網電視
更多新聞短片
蕭炯柱話,今次係佢第一次教視障嘅小朋友。(葉華英攝)
心光盲人院暨學校及青年音樂訓練基金今日(24日)聯合舉辦《MOY心光聖誕音樂會》,安排咗視障同健視嘅學生一齊演出,推動音樂無分界限,署理特首張建宗都有出席支持,仲大讚呢個計劃,話有效幫到有唔同需要嘅小朋友,聽到佢地嘅演奏覺得好感動,仲自爆忍唔住抹咗5次眼淚添啊!
音樂會指揮蕭炯柱話,今次係佢第一次教視障嘅小朋友,覺得教佢哋唱歌並唔困難,但樂器就教唔到喇,雖然佢自幼學習小提琴,水平相當高,但教視障小朋友嘅話都係要請更加專業嘅樂器導師先做到喎。不過睇到班視障小朋友笑住演出,享受音樂,佢就覺得自己嘅得着都好多,話仲多過班小朋友,令佢有動力繼續教落去。
問到會唔會擴大樂團嘅規模,蕭炯柱就話現時樂團係中西合璧嘅,中樂同西樂各佔60個位,規模已經唔細,如果再加人手的話,將會好難安排合適嘅位置畀新人喇!