政Whats噏：馮檢基唔做Plan B　拒梁家傑李卓人空降

民主派就立法會九龍西補選嘅內鬥愈演愈烈。民協前立法會議員馮檢基(阿基)今日(22日)正式宣布放棄做「Plan B(後補人選)」，但同時堅持應按照民主派初選機制，若建築界立法會議員姚松炎被取消參選資格(DQ)，就應由喺初選中得分排第3嘅民主黨深水埗區議員袁海文頂上做「Plan C」。分析指此舉顯示民協力抗公民黨或工黨派人空降九西參選，以免影響民協喺2020年立法會換屆選舉嘅選情。

阿基喺民主派九西補選中得分排第2，按原定機制如勝出初選嘅姚松炎被DQ，民主派應支持阿基做後補參選，惟部分民主派質疑佢嘅吸票能力欠佳，密謀推翻各黨協議，改由公民黨主席梁家傑或工黨前立法會議員李卓人空降九西做「Plan B」。

民協與民主黨一直強烈反對有關做法，認為會損害整個民主派嘅誠信，但喺各方壓力下，阿基今日終於宣布棄選，但民協同時提出應繼續按機制改由袁海文做「Plan C」。

阿基喺記者會形容，今次棄選係「退一步海闊天空」，批評部分民主派喺網上肆虐攻擊佢，甚至連佢阿爸阿媽同個仔都被鬧埋。佢引述已故支聯會主席司徒華嘅名言「成功不必我在，功成其中有我」時，更加一度哽咽。好明顯首先被DQ嘅唔係姚松炎，而係阿基，而且仲係畀自己友DQ。

不過，眾所周知袁海文嘅知名度及吸票能力比阿基更弱，令人質疑民協其實係死都唔肯畀梁家傑或李卓人空降九西。自毛孟靜退黨後，公民黨喺九西就冇咗立法會代表，工黨更一直無法攻入九西，正所謂「請鬼容易送鬼難」，如果今次改由梁家傑或李卓人出戰補選，勢會影響民協喺2年後重奪九西議席嘅機會。

對於阿基棄選，喺今次事件與民協站喺同一陣線嘅民主黨立即為佢呼寃，認為佢根本唔應該退，至於袁海文會否頂上做「Plan C」，該黨就要再開會決定。喺另一邊廂，力撐梁家傑同李卓人空降嘅民主派人士就放風話，就算阿基唔選，按機制都未必輪到袁海文，可見佢哋並非純粹針對阿基，而係吼住原屬青年新政游蕙禎嘅議席同選票！已報名參選九西嘅仲有民建聯深水埗區議員鄭泳舜。